عارضی آرڈیننس دے تحت کیتیاں گئیاں تقرریاں مستقل حیثیت نہیں رکھدیاں: وفاقی آئینی عدالت
جے عارضی آرڈیننس دے تحت کیتے گئے اقدامات نوں مستقل قانونی حیثیت دتی گئی تاں انتظامیہ نوں پارلیمنٹ دے قانون سازی دے اختیار نوں نظرانداز کرن دا رستہ مل جائے گا: فیصلہ، صرف ایف آئی آر جرم دا ثبوت نہیں، بریت دے باوجود پولیس بھرتی توں نااہلی غیر قانونی قرار، مقدمیاں دی جانچ لئی 6 اصول طے
اسلام آباد (کورٹ رپورٹر) وفاقی آئینی عدالت نے واضح کیتا اے کہ عارضی آرڈیننس دے تحت کیتیاں گئیاں تقرریاں نوں مستقل حیثیت حاصل نہیں ہو سکدی، جدوں تک پارلیمنٹ باقاعدہ قانون سازی دے ذریعے انہاں نوں تحفظ فراہم نہ کرے۔ آرڈیننس دی مدت ختم ہون توں بعد اس دے تحت حاصل کیتے گئے عہدیاں اُتے تاحیات برقرار رہن دا دعویٰ نہیں کیتا جا سکدا۔
عدالت نے اسلام آباد کیپیٹل ٹیریٹری پرائیویٹ ایجوکیشنل انسٹی ٹیوشنز ریگولیٹری اتھارٹی دے ممبر اکیڈمکس امتیاز علی قریشی تے ممبر رجسٹریشن وقاص محمود دی برطرفی دے خلاف درخواستاں منظور کردیاں اسلام آباد ہائیکورٹ دے فیصلے کالعدم قرار دے دتے تے دوناں دیاں آئینی درخواستاں خارج کر دتیاں۔
تین رکنی بینچ دا تفصیلی فیصلہ جسٹس عامر فاروق نے تحریر کیتا، جس وچ قرار دتا گیا کہ مذکورہ تقرریاں ایسے عارضی آرڈیننس دے تحت کیتیاں گئیاں سن، جو اپنی آئینی مدت پوری ہون اُتے ختم ہو گیا۔ جے عارضی آرڈیننس دے تحت کیتے گئے اقدامات نوں مستقل قانونی حیثیت دتی جائے تاں انتظامیہ نوں پارلیمنٹ دے قانون سازی دے اختیار نوں نظرانداز کرن دا رستہ مل جائے گا۔
اتھارٹی دا قیام 2006ء دے آرڈیننس دے ذریعے عمل وچ آیا۔ بعد وچ 2007ء تے 2009ء وچ وی آرڈیننس جاری کیتے گئے، جو اپنی مدت پوری ہون اُتے ختم ہو گئے۔ 19 مارچ 2013ء نوں پارلیمنٹ نے مستقل قانون منظور کیتا، جس وچ سابقہ آرڈیننس دے تحت کیتیاں گئیاں تقرریاں نوں تحفظ فراہم نہیں کیتا گیا۔
فیصلے وچ سپریم کورٹ دے 2018ء ایس سی ایم آر 1956ء دے فیصلے دا حوالہ دیندے ہوئے آکھیا گیا کہ آرڈیننس دے ذریعے مستقل قانون وچ کیتیاں گئیاں ترامیم وی آرڈیننس دی مدت ختم ہون توں بعد برقرار نہیں رہ سکدیاں، جدوں تک پارلیمنٹ انہاں نوں قانون دا حصہ نہ بنا دے۔
دوجے پاسے وفاقی آئینی عدالت نے سرکاری ملازمتاں وچ بھرتی توں پہلاں امیدواراں دے کردار تے سابقہ مقدمیاں دی جانچ پڑتال لئی 6 اصول طے کردیاں قرار دتا کہ صرف ایف آئی آر دا اندراج کسی امیدوار نوں سرکاری ملازمت لئی خودبخود نااہل قرار دین دی بنیاد نہیں بن سکدا۔ صرف ایف آئی آر درج ہون نوں جرم دا ثبوت نہیں منیا جا سکدا تے نہ ہی ایس نال جرم دا مفروضہ قائم ہوندا اے۔
چیف جسٹس امین الدین خان نے ڈرائیور کانسٹیبل بھرتی کیس دا تحریری فیصلہ جاری کردیاں بریت دے باوجود امیدوار نوں بھرتی توں نااہل قرار دین والا نوٹیفکیشن تے لاہور ہائیکورٹ ملتان بینچ دا فیصلہ کالعدم قرار دے دتا۔
عدالت نے قرار دتا کہ کسی امیدوار نوں سماعت دا موقع دتے بغیر تے معقول وجوہات دے بغیر عام طور اُتے بھرتی توں خارج نہیں کیتا جا سکدا۔ عدالت نے عبداللطیف دی امیدواری بحال کرن تے متعلقہ حکام نوں 30 دناں دے اندر قانونی کارروائی مکمل کرکے تقرری دا حکم جاری کرن دی ہدایت کیتی۔
درخواست گزار 2018ء وچ اک مقدمے توں بری ہویا سی، جدکہ اس کول صاف پولیس کریکٹر سرٹیفکیٹ وی موجود سی۔
