جسٹس (ر) منصور علی شاہ دا انٹرویو حقائق دے منافی اے: الیکشن کمیشن

اسلام آباد (آئی این پی) الیکشن کمیشن نے سپریم کورٹ دے سابق جج جسٹس (ر) منصور علی شاہ دے حالیہ انٹرویو اُتے ردعمل دیندے ہوئے آکھیا اے کہ انہاں دا مؤقف سپریم کورٹ دے حتمی فیصلے دے برعکس اے۔

رپورٹ دے مطابق الیکشن کمیشن آف پاکستان دے ترجمان نے سپریم کورٹ دے سابق جج جسٹس (ر) منصور علی شاہ دے حالیہ انٹرویو نوں آئینی تے قانونی حقائق دے منافی قرار دیندے ہوئے آکھیا کہ عدالتی ریکارڈ نوں چُنیدہ حوالیاں تے ادھورے تناظر وچ پیش کرنا انتہائی نامناسب اے۔

الیکشن کمیشن دے ترجمان نے واضح کیتا کہ پنجاب تے خیبر پختونخوا وچ الیکشن نال متعلق فیصلے نوں 4-3 دا فیصلہ قرار دینا درست نہیں، جدکہ جسٹس (ر) منصور علی شاہ دا مؤقف سپریم کورٹ دے اپنے حتمی فیصلے دے برعکس اے۔

ترجمان دے مطابق پی ٹی آئی نے مقررہ وقت تک انٹرا پارٹی انتخابات دا قانونی معیار پورا نہیں کیتا۔ پارٹی نوں 3 موقعے دتے گئے، پر اوہ آئین دے مطابق انتخابات کرواؤن وچ ناکام رہی۔ ایس اُتے الیکشن ایکٹ دے تحت پارٹی نوں نااہل قرار دے کے انتخابی نشان واپس لے لیا گیا، جدکہ سپریم کورٹ نے نشان واپس لین دا فیصلہ برقرار رکھیا تے نظرثانی دی درخواست وی مسترد کر دتی۔

ترجمان نے وضاحت کیتی کہ پی ٹی آئی انٹرا پارٹی کیس وچ حکمِ امتناع پارٹی نے خود ہائیکورٹ توں حاصل کیتا سی، تاہم پی ٹی آئی اج وی الیکشن کمیشن دے ریکارڈ وچ رجسٹرڈ جماعت دے طور اُتے موجود اے۔

آئین دے آرٹیکل 51، 106 تے الیکشن ایکٹ مخصوص نشستاں دی تقسیم دا طریقہ کار دس دے نیں۔ مخصوص نشستاں صرف الیکشن وچ حصہ لین والیاں جماعتاں دا حق نیں۔ چونکہ پی ٹی آئی نے ترجیحی فہرست جمع نہیں کروائی سی، ایس لئی اوہ مخصوص نشستاں دی اہل نہیں سی۔ آزاد امیدوار تے بغیر نشستاں والی جماعتاں آئین دے تحت مخصوص نشستاں دیاں حقدار نہیں ہوندیاں۔