ملزم نال ناں ملدا جلدا ہون دی وجہ نال مقدمات وچ پھسن دا معاملہ، آئی جی تے نادرا نوں نوٹس

دوجے شخص دے وارنٹ وچ میرے مؤکل کاشف دا شناختی کارڈ نمبر درج کر دتا گیا، وکیل

پولیس ریکارڈ دی درستی، شناختی کارڈ بحال کرن، گرفتاری تے ہراسانی توں تحفظ فراہم کرن دی استدعا، درخواست گزار

کراچی (سٹاف رپورٹر) سندھ ہائیکورٹ نے شہری دے شناختی کارڈ نوں مبینہ طور اُتے دوجے شخص دے خلاف درج مقدمیاں دے پولیس ریکارڈ وچ شامل کرن دے معاملے اُتے آئی جی سندھ، نادرا تے ہور متعلقہ حکام نوں نوٹس جاری کردے ہوئے جواب طلب کر لیا۔

جسٹس محمد سلیم جیسَر تے جسٹس عبد الحمید بھُرگری اُتے مشتمل آئینی بینچ ون نے پولیس حکام نوں ہدایت کیتی کہ درخواست گزار کاشف ولد محمد بچل دے شناختی کارڈ اُتے درج مقدمیاں دیاں تفصیلات عدالت وچ پیش کیتیاں جان۔

درخواست گزار دے وکیل جہانگیر شمس نے مؤقف اختیار کیتا کہ انہاں دے مؤکل دا ناں اک دوجے شخص کاشف عرف کے کے عرف سندھی نال ملدا جلدا ہون دی وجہ توں پاک کالونی پولیس نے اوہدا شناختی کارڈ دوجے شخص دے خلاف درج لگ بھگ 29 مقدمیاں دے ریکارڈ وچ شامل کر دتا۔

وکیل دے مطابق دوجے شخص دے خلاف جاری ناقابل ضمانت وارنٹ گرفتاری وچ وی درخواست گزار دا شناختی کارڈ نمبر درج کر دتا گیا، جس دے نتیجے وچ اوہدا شناختی کارڈ بلاک ہو گیا۔

درخواست گزار نوں دسمبر 2025 وچ ایس غلط اندراج دی بنیاد اُتے اتحاد ٹاؤن تھانے وچ لگ بھگ اک ہفتے تک حراست وچ وی رکھیا گیا، تاہم تصدیق تے تفتیش توں بعد رہا کر دتا گیا۔

وکیل نے دسیا کہ پولیس دے اعلیٰ حکام نوں ریکارڈ دی درستی لئی درخواستاں دتیاں گئیاں، پر کوئی کارروائی نہیں ہوئی، جدکہ سیشن عدالت وچ دائر درخواست وی مسترد کر دتی گئی۔

درخواست وچ استدعا کیتی گئی اے کہ درخواست گزار دا شناختی کارڈ دوجے شخص دے مقدمیاں تے پولیس دے مرکزی ریکارڈ توں وکھ کیتا جاوے، پولیس ریکارڈ دی درستی تے شناختی کارڈ بحال کرن دا حکم دتا جاوے، نالے اوہنوں گرفتاری تے ہراسانی توں تحفظ فراہم کیتا جاوے۔

عدالت نے مزید سماعت 15 دسمبر تک ملتوی کر دتی۔