کسی سرکاری ادارے وچ وزیراں دی سفارش برداشت نہیں کراں گے : چیف جسٹس

اسلام آباد: چیف جسٹس پاکستان گلزار احمد نے آکھیا کہ کسی وی سرکاری ادارے وچ وزیراں دے سفارشی برداشت نہیں کراں گے ۔سپریم کورٹ وچ ورکرز ویلفیئر بورڈ خیبر پختون خوا دے ملازماں بارے مقدمات دی سماعت ہوئی ، عدالت نے294استاداں تے تعلیمی عملے دی بر طرفی خلاف اپیل خارج کر دتی ۔چیف جسٹس نے ریمارکس دتے کہ کسی وی سرکاری ادارے وچ وزیراں دے سفارشی برداشت نہیں کراں گے ۔ورکرز ویلفیئر بورڈ کے پی کے کرپٹ ترین ادارہ اے جس اندر کرپشن تے اقرباپروری عروج اُتے اے تے گھوسٹ ملازمین بھریا پیااے۔ ساریاں بھرتیاں سیاسی نے یا فیر افسراں نے اپنے رشتہ دار بھرتی کیتے ہوئے نیں ، لگدا اے کہ سارا کے پی کے صرف سرکاری ملازمت ہی کردا اے ، ورکرز ویلفیئر بورڈ افسراں نوں ذرا وی شرم نہیں آندی ، کوئی ملازم وی قانون دے مطابق بھرتی نہیں کیتا گیا ۔جسٹس اعجاز الاحسن نے آکھیا کہ ورکرز ویلفیئر بورڈ بھرتیاںاندر وزیراں دا کی کم ؟ مزدوراں دا پیسہ سیاسی رشوت دے طور تے سُٹیا جاندا اے،چیف جسٹس نے ورکرزویلفیئر بورڈ تحلیل کر کے ملازم فارغ کرن دا عندیہ دیندیاں ہوئے آکھیا کہ سارے افسراں نوں فارغ کر دیاں گے ، وڈیاں وڈیاں تنخواہاں لیون والیاں نے ادارے لئی کوئی چنگا کم نہیں کیتا ۔ بورڈ وچ مزدوراں دا پیسہ اے ایس لئی حکومت دلچسپی نہیں لیندی ، نوا بورڈ بنایا جائے گا تے ساریاں بھرتیاں وی دوبارہ ہوون گیاں ،اے سب کجھ لکھ کے دیاں گے ۔