ٹیکس تے ودھدی لاگت کاروباری برادری دے اصل مسئلے نیں: گیلانی
کاروباری برادری نوں قائمہ کمیٹیاں وچ تجاویز پیش کرن دا موقع دتا جائے گا: خطاب
چھاپیاں، ایف آئی آرز تے گرفتاریوں نال عدم تحفظ پیدا ہو رہیا اے، صدر لاہور چیمبر
لاہور (کامرس رپورٹر) چیئرمین سینیٹ سید یوسف رضا گیلانی نے لاہور چیمبر وچ اجلاس نوں خطاب کردیاں آکھیا اے کہ کاروباری برادری نوں سینیٹ دیاں متعلقہ قائمہ کمیٹیاں، خاص طور اُتے خزانے، معاشیات، تجارت تے صنعت نال متعلق کمیٹیاں وچ اپنا مؤقف تے تجاویز پیش کرن دا موقع دتا جائے گا۔ مؤثر معاشی پالیسیاں بناؤن لئی سارے متعلقہ فریقین نال مشاورت ضروری اے۔
ایس موقعے اُتے لاہور چیمبر دے صدر علی حسام اصغر، سینئر نائب صدر سردار عثمان غنی، نائب صدر خادم حسین، رکن قومی اسمبلی سید علی قاسم گیلانی، سابق صدور میاں مصباح الرحمٰن تے میاں عزیز الرحمٰن چن نے وی خطاب کیتا۔
چیئرمین سینیٹ نے آکھیا کہ ٹیکساں دے مسئلے، ریگولیٹری رکاوٹاں، پالیسیاں وچ عدم تسلسل تے کاروبار دی ودھدی ہوئی لاگت کاروباری برادری دے اصل مسئلے نیں، جنہاں اُتے توجہ دینا ضروری اے۔ سینیٹ ایسا قانونی تے پالیسی ماحول تشکیل دین وچ اپنا کردار ادا کرے گی، جیہڑا کاروبار دے فروغ، جائز کاروباری مفادات دے تحفظ تے قومی معاشی ترجیحات دے حصول وچ مددگار ثابت ہووے۔
سید یوسف رضا گیلانی نے لاہور چیمبر اُتے زور دتا کہ اوہ پارلیمانی اداریاں نال اپنا رابطہ تے تعاون جاری رکھے۔ انہاں آکھیا کہ چیمبرز دا عملی تجربہ، تجاویز تے مختلف شعبیاں بارے معلومات قانون سازی تے پارلیمانی نگرانی دے عمل وچ اہم کردار ادا کر سکدیاں نیں۔
لاہور چیمبر دے صدر علی حسام اصغر نے چیئرمین سینیٹ اُتے زور دتا کہ اوہ کاروبار نال متعلق قوانین دا جائزہ لین، ریگولیٹری مسئلے حل کرن تے کاروبار دوست ماحول قائم کرن وچ اپنا کردار ادا کرن۔ انہاں آکھیا کہ کجھ قوانین نے کاروبار کرن دی آسانی تے لاگت نوں متاثر کیتا اے۔
انہاں مختلف ریگولیٹری قوانین دے تحت صنعتی تے تجارتی اداریاں اُتے چھاپیاں، ایف آئی آرز تے گرفتاریواں دے معاملے دی نشاندہی کردیاں آکھیا کہ ایسے اقدامات نال کاروباری طبقے وچ تشویش تے عدم تحفظ پیدا ہو رہیا اے۔
علی حسام اصغر نے واضح کیتا کہ کاروباری برادری قوانین اُتے عمل درآمد تے اصلاحات دے خلاف نہیں، تاہم انہاں دا طریقہ کار کاروباری افراد لئی ہراسانی دا سبب نہیں بننا چاہیدا۔ رکن قومی اسمبلی سید علی قاسم گیلانی نے قانون سازی دے معاملے وچ لاہور چیمبر نوں تعاون دی پیشکش کیتی۔
