سائبر حملیاں دے خطرے ودھ گئے، سرکاری تے نجی اداریاں نوں حفاظتی انتظامات فوری طور اُتے سخت کرن دی ہدایت
اے آئی راہیں سائبر حملیاں دے خطرے ودھ گئے، ڈیجیٹل بینکنگ پلیٹ فارمز، تیل تے گیس دیاں تنصیبات، پانی دیاں سہولتاں، بجلی دی پیداوار تے ٹرانسپورٹ دے نظام نوں نشانہ بنایا جا سکدا اے
ظاہر کیتے گئے اکاؤنٹ بیلنس وچ ردوبدل نال صارفاں وچ خوف تے ہراس پھیلّن دا خدشہ، مشتبہ واقعات دی فوری رپورٹنگ دی ہدایت، نیشنل سائبر ایمرجنسی ریسپانس ٹیم ولوں ایڈوائزری جاری
اسلام آباد (نمائندہ) سائبر حملیاں دے خطرے ودھ گئے نیں، سرکاری تے نجی اداریاں نوں حفاظتی انتظامات فوری طور اُتے سخت کرن دی ہدایت کر دتی گئی اے۔
نیشنل سائبر ایمرجنسی ریسپانس ٹیم نے جدید اے آئی سائبر خطرات بارے ایڈوائزری جاری کردیاں خبردار کیتا اے کہ مالیاتی اداریاں تے اہم انفراسٹرکچر اُتے اے آئی راہیں سائبر حملیاں دا خطرہ ودھ رہیا اے۔
بینکاں دے کور بینکنگ سسٹمز تے ڈیجیٹل بینکنگ پلیٹ فارمز نشانے اُتے ہو سکدے نیں۔ تیل تے گیس دیاں تنصیبات، پانی دیاں سہولتاں تے بجلی دے نیٹ ورک وی خطرے وچ نیں۔ بجلی دی پیداوار تے تقسیم، مینوفیکچرنگ تے ٹرانسپورٹ دے نظام نوں وی نشانہ بنایا جا سکدا اے۔
ایڈوائزری مطابق اے آئی، خودکار بوٹس، بوٹ نیٹس تے ایجنٹک ٹولز دے ذریعے حملیاں دی رفتار تے پیچیدگی ودھ رہی اے۔ بینکاں دے اے پی آئیز، ادائیگیاں دے نظام تے صارفاں دیاں ایپلی کیشنز اُتے حملیاں دا خدشہ اے۔
آن لائن خدمتاں وچ خلل تے خودکار اسناد اُتے مبنی حملے ہو سکدے نیں۔ ظاہر کیتے گئے اکاؤنٹ بیلنس وچ ردوبدل راہیں صارفاں وچ خوف تے ہراس پھیلایا جا سکدا اے۔
تھرڈ پارٹی سروس فراہم کرن والیاں تے منسلک آئی او ٹی ڈیوائسز توں اہم انفراسٹرکچر نوں وی خطرات لاحق نیں۔ نیشنل سائبر ایمرجنسی ریسپانس ٹیم نے خبردار کیتا اے کہ صنعتی کنٹرول سسٹمز دیاں کمزوریاں تے غیر محفوظ ریموٹ رسائی وی خطرہ بن چکیاں نیں۔
یورپی سپر مارکیٹاں دے ریفریجریشن تے فریزر سسٹمز اُتے حملیاں دا حوالہ دیندیاں آگاہ کیتا گیا اے کہ منسلک آپریشنل سسٹمز اُتے حملیاں دے جسمانی تے تجارتی اثرات سامنے آئے نیں، تاہم یورپ وچ پیش آئے واقعات وچ اے آئی دے ملوث ہون دی ہن تک تصدیق نہیں ہوئی۔
ایڈوائزری وچ خودکار لاگ اِن دیاں کوششاں تے بار بار ناکام تصدیق دے واقعات اُتے نظر رکھن دی سفارش کیتی گئی اے۔ اسناد دی بھرمار تے غیر معمولی اے پی آئی ریکویسٹس دی نگرانی کرن دی تجویز وی دتی گئی اے۔
ایپلی کیشن کنفیگریشن وچ تبدیلی، غیر معمولی لین دین دے طریقیاں، کور بینکنگ ریکارڈ تے صارفاں دے بیلنس وچ فرق، ریفائنری، پائپ لائن، بجلی دے گرڈ تے بجلی دے پیرامیٹرز وچ تبدیلیاں اُتے وی چیک اینڈ بیلنس رکھن دی ہدایت کیتی گئی اے۔
ایڈوائزری وچ ہدایت کیتی گئی اے کہ کور بینکنگ سکیورٹی، اے پی آئیز، پیمنٹ گیٹ ویز، صارفاں دیاں ایپلی کیشنز تے کور بینکنگ ریکارڈ دی حفاظت یقینی بنائی جائے۔
آزادانہ لین دین دی جانچ تے بوٹس راہیں ہون والیاں کوششاں دی نگرانی کیتی جائے۔ انٹرنیٹ نال منسلک آئی او ٹی تے او ٹی اثاثیاں دی نشاندہی کرکے براہِ راست انٹرنیٹ رسائی تے تھرڈ پارٹی مینٹی ننس کنکشنز محدود کیتے جان۔
او ٹی تے آئی ٹی نیٹ ورکس دی علیحدگی، مسلسل نگرانی، سکیورٹی اپ ڈیٹس تے بیک اَپ آپریٹنگ طریقہ کار برقرار رکھن دی ہدایت وی کیتی گئی اے۔
بوٹس راہیں ہون والے اے آئی سائبر حملیاں دے مقابلے لئی تیاری دا جائزہ لیا جائے، واقعات نال نمٹن دے نظام، کاروباری تسلسل تے سکیورٹی مانیٹرنگ نوں بہتر بنایا جائے۔
سکیورٹی لاگز محفوظ رکھن تے کسے وی مشتبہ واقعے دی فوری رپورٹ کرن دی ہدایت کیتی گئی اے۔
