منی لانڈرنگ کیس: شہباز شریف دی عبوری ضمانت وچ 23جولائی تک وادھا

لہور: منی لانڈرنگ تے آمدن توں ودھ اثاثے بنان دے کیس وچ لہور ہائی کورٹ نے شہباز شریف دی عبوری ضمانت وچ 23جولائی تک وادھا کر دتا۔ لہور ہائی کورٹ دے جسٹس مسعود عابد نقوی دی سربراہی وچ دو رکنی بینچ نے شہباز شریف دی عرضی تے سماعت کیتی۔ قائد حزب اختلاف میاں شہباز شریف بنچ دے ساہمنے پیش ہوئے۔ دوران سماعت درخواست گزار دے وکیلاں دی عدم دستیابی پاروں شہباز شریف دی ضمانت وچ وادھے دی استدعا کیتی گئی۔ عدالت نوں دسیا گیا شہباز شریف دے وکیل امجد پرویز ایڈووکیٹ تے اعظم نذیر تارڑ ایڈووکیٹ اسلام آباد وچ مصروف نیں۔ نیب وکیل نے عدالت نوں دسیا چیف جسٹس آف پاکستان نے نیب کیسز جلد نبیڑن دا آکھیا اے۔ لیگی رہنما شہباز شریف آپ روسٹرم تے آئے تے آکھیا میں ڈاکٹراں دے مشورے دے خلاف عدالت دے احترام دی خاطر پیش ہویا آں، وکھو وکھ فورمز تے میری بیماری نوں سیاسی رنگ دتا جا رہیا اے جہدے تے جسٹس مسعود عابد نقوی نے واضح کیتا کہ عدالت دے آخری آرڈر دے مطابق تہانوں حاضری توں چھوٹ وی دتی گئی سی۔ شہباز شریف نے بنچ نوں دسیا کہ نیب حکام نے آخری وار پیشی وچ تسلیم کیتا کہ ایہناں دی تفتیش پوری ہو گئی اے، حلفاً کہنا آں کہ نیب دے دفتر وچ 7لوک بیٹھے سن جہناں نے تفتیش مکمل ہون دا آکھیا ، ایس لئی ہن میری ضمانت دی درخواست تے اللہ نے یا ایس عدالت نے فیصلہ کرنا اے۔