رولا پیا اے غیر منتخب بندے حکومت چلا رہے نیں: لہور ہائی کورٹ
چیف جسٹس لہور ہائی کورٹ نے پٹرولیم مصنوعات دی قیمتاں وچ وادھے بارے کیس وچ ریمارکس دتے نیں رولا پیا اے غیر منتخب بندے حکومت چلا رہے نیں۔ چیف جسٹس لہور ہائی کورٹ جسٹس قاسم خان نے پٹرولیم مصنوعات دی قلت بارے درخواستاں تے سماعت کیتی۔ چیئرپرسن اوگرا عظمیٰ عادل، اٹارنی جنرل، چیف سیکرٹری پنجاب عدالت وچ پیش ہوئے۔ ڈپٹی اٹارنی جنرل نے کابینہ دے اجلاس دی رپورٹ عدالت وچ پیش کیتی۔ عدالتی معاون نے دسیا پٹرول دی درآمد تے ذخیرے نوں ملک دی لوڑ دے مطابق ریگولیٹ کرنا اوگرا تے وزارت پٹرولیم دی ذمہ داری سی، اوگرا، وزارت پٹرولیم، آئل کمپنیاں تے عوام ایس کیس وچ متعلقہ فریق نیں۔ درخواست گزار آکھیا پٹرول فروخت کرن والی کمپنیاں نے نجائز منافع خوری لئی قیمتاں ودھائیاں، اوگرا سنے دوجے حکومتی ادارے پٹرول دی قیمتاں تے قلت اُتے قابو پان وچ نکام رہے، عدالت پٹرولم مصنوعات دی قلت تے قیمتاں دے وادھے دے ذمہ داراں دے خلاف کاروائی دا حکم دیوے۔جسٹس قاسم خان آکھیا رولا پیا اے غیر منتخب بندے حکومت چلا رہے نیں جہڑے عوام دا نہیں سوچدے، عوامی نمائندیاں دی سوچ عوام دی فلاح اے تے جہڑے عوامی نمائندہ نہیں ایہناں دی سوچ نہ عوام دے مفاد لئی نہ ریاست لئی اے، سگوں صرف کمپنی دا مفاد اے۔
