احساس کیش پروگرام نوں 144توں ودھا کے 203ارب روپے کرن دا اعلان

اسلام آباد: وفاقی حکومت نے احساس ایمرجنسی کیش پروگرام دا بجٹ 144توں ودھا کے 203ارب روپے کرن دا اعلان کر دتا۔ وزیراعظم دی معاون خصوصی برائے غربت مٹاؤ پروگرام ڈاکٹر ثانیہ نشتر نے پریس کانفرنس کردیاں آکھیا احساس ایمرجنسی کیش پروگرام دا بجٹ 144ار ب روپے توں ودھا کے 203ارب روپے کر دتا گیا جہدے توں اک کروڑ 69لکھ خاندان مستفید ہون گے۔ ڈاکٹر ثانیہ نشتر آکھیا ایس پروگرام نے کووڈ19پاروں لاک ڈاؤن دے معاشی اثرات نوں گھٹ کرن وچ نمایاں کردار ادا کیتا، ابتدائی طور تے پروگرام دا آغاز کیتا گیا سی تے 12ملین مستحقین لئی ایہدا بجٹ 144ارب روپے سی۔ معاون خصوصی نے دسیا احساس پروگرام مکمل طور تے اک شفاف، قواعد و ضوابط تے مبنی غیر سیاسی پروگرام اے جہدے وچ صوبہ سندھ دا حصہ سب توں ودھ اے جہڑا ایس پروگرام دے غیر سیاسی ہون دا مظہر اے۔ ثانیہ نشتر دا کہنا سی بائیو میٹرک دی تصدیق دے مسئلے تے وفات پان والے مستحقین دے لواحقین دے اہل خانہ نوں ادائیگیاں کرنا وڈا چیلنج سی، بائیو میٹرک مشکلات پاروں مستحق بندیاں وچ ادائیگیاں نوں یقینی بنان لئی متبادل طریقہ کار دا حل پیش کیتا۔معاون خصوصی ہور آکھیا 8جولائی 2020نوں احساس ایمرجنسی کیش پورٹل دا اجراء کیتا گیا، ہن تک پورے ملک وچ 1کروڑ 28لکھ 63ہزار توں ودھ محنت کش بندیاں وچ 155ارب 64کروڑ روپے توں ودھ دی امدادی رقم تقسیم کیتی جا چکی اے۔