پاکستان ، سعودی عر ب کے معاشی تعلقات میں اہم پیش رفت:دونوں ملکوں کے سرمایہ کاروں نے دوطرفہ تجارت اور سرمایہ کاری کے فروغ کے لیے مشترکہ پرائیویٹ ایکویٹی فنڈ قائم کرنے کا معاہدہ کرلیا
- کئی سو ملین ڈالر دے ابتدائی سرمائے نال فنڈ دا آغاز، 75 فیصد پاکستان تے 25 فیصد سعودی منصوبیاں لئی مختص، زراعت، کان کنی، تعمیرات تے سرکاری اثاثیاں دی تجارتی ترقی اُتے سرمایہ کاری دا منصوبہ۔ دوناں ملکاں دے مالیاتی تے ہور اداریاں نوں فنڈ دی انتظامی کمپنی وچ حصے دار بنن دی دعوت وی دِتی جا سکے گی۔ منظوری توں بعد فنڈ دی حتمی ساخت تے ابتدائی سرمایہ کاری دے پروگرام طے کیتے جان گے۔
- ریاض / اسلام آباد (نیوز ایجنسیاں) پاکستان تے سعودی عرب دے درمیان اقتصادی تعاون نوں عملی سرمایہ کاری وچ تبدیل کرن ول اہم پیش رفت ہوئی اے۔ دوناں ملکاں دے سرمایہ کاراں نے دوطرفہ تجارت تے سرمایہ کاری نوں فروغ دین لئی مشترکہ پرائیویٹ ایکویٹی فنڈ قائم کرن دا معاہدہ کر لیا اے۔
- فنڈ دا ابتدائی حجم کئی سو ملین ڈالر ہووے گا، جس دا 75 فیصد سرمایہ پاکستان جبکہ 25 فیصد سعودی عرب دے ترقیاتی تے تجارتی منصوبیاں وچ لایا جائے گا۔
- خبر رساں ادارے رائٹرز دے مطابق سعودی پاکستان جوائنٹ بزنس کونسل نے پیر دے روز ایس فنڈ دے قیام دا اعلان کیتا۔ کونسل دا کہنا اے کہ سرمایہ کاری دے نویں مواقع سامنے آؤن نال فنڈ دا حجم ہور ودھایا جا سکدا اے۔ دوناں ملکاں دے نجی سرمایہ کار فنڈ وچ برابر سرمایہ فراہم کرن گے۔
- فنڈ دے تحت پاکستان وچ زراعت، کان کنی، تعمیرات تے ہور تیزی نال ترقی کرن والے کاروباری شعبیاں وچ سرمایہ کاری کیتی جائے گی۔
- ایس توں علاوہ حکومت پاکستان دے سرکاری اثاثیاں تے زمیناں نوں تجارتی مقاصد لئی ورتن دے منصوبے وی سرمایہ کاری لئی زیر غور آؤن گے۔ انہاں منصوبیاں وچ ہوائی اڈیاں، موٹرویز، بندرگاہاں تے بحری شعبے دی ترقی شامل اے۔
- سعودی عرب وچ وی تجارتی سرمایہ کاری دے مواقع لبھے جان گے، جنہاں وچ مقدس شہراں دے منصوبے وی شامل نیں۔
- معاہدے دے تحت دوناں ملکاں دے مالیاتی تے ہور اداریاں نوں فنڈ دی انتظامی کمپنی وچ حصے دار بنن دی دعوت وی دِتی جا سکے گی، جس نال سرمایہ کاری دے دائرے نوں وسعت دین وچ مدد مل سکدی اے۔
- ایہ پیش رفت ایسے ویلے سامنے آئی اے جدوں پاکستان تے سعودی عرب اپنے دیرینہ تعلقات نوں دفاع توں اگے ودھا کے وسیع تر اقتصادی شراکت داری وچ تبدیل کرن دی کوشش کر رہے نیں۔
- گزشتہ ماہ سعودی پاکستان جوائنٹ بزنس کونسل دے چیئرمین شہزادہ منصور بن محمد آل سعود نے اعلیٰ سطح دے کاروباری وفد دے نال پاکستان دا دورہ وی کیتا سی۔
- ایس توں پہلاں دوناں ملک پاکستانی زرعی تے غذائی مصنوعات دی سعودی عرب برآمدات تین ارب ڈالر تک ودھاؤن اُتے وی اتفاق کر چکے نیں۔
- تاہم مشترکہ فنڈ دے قیام تے سرمایہ کاری دے عملی آغاز لئی پاکستان تے سعودی عرب دے متعلقہ حکومتی تے مالیاتی اداریاں دیاں منظوریواں ضروری ہون گیاں۔ منظوری توں بعد فنڈ دی حتمی ساخت تے ابتدائی سرمایہ کاری دے منصوبے طے کیتے جان گے۔
