چھوٹے صوبے بنن نال خرچے گھٹن گے تے ترقی ہووے گی: محمد علی درانی
ریفرنڈم مسئلے دا حل نئیں، حکومت نوں عوامی رائے اگے سر جھکا دینا چاہیدا اے، پارلیمنٹ وچ ہن تک کوئی گل نئیں ہوئی: نیئر بخاری
لاہور (مانیٹرنگ ڈیسک) سینئر سیاستدان محمد علی درانی نے آکھیا اے کہ میں 2008 وچ دو صوبیاں دی گل شروع کیتی سی تے بہاولپور تے جنوبی پنجاب صوبیاں لئی صوبائی اسمبلی وچ قرارداد منظور کروائی سی۔ خیبر پختونخوا اسمبلی وی ہزارہ صوبے دی منظوری دے چکی اے۔
گفتگو کردیاں محمد علی درانی نے آکھیا کہ چھوٹے صوبے بنن نال ملک وچ معاشی ترقی ہووے گی تے اخراجات وی گھٹن گے۔ چار صوبیاں نوں مقدس گائے کیوں سمجھیا جا ریا اے؟ انہاں آکھیا کہ ایس توں وڈا ظلم ایہہ اے کہ ملک وچ لوکل گورنمنٹ موجود نئیں۔
اک سوال دے جواب وچ انہاں آکھیا کہ میرا واضح مؤقف اے کہ ریفرنڈم مسئلے دا حل نئیں، بلکہ ریفرنڈم بدنام ہو چکیا اے، ایس لئی ایسا کوئی قدم ریفرنڈم دے ذریعے نئیں چکنا چاہیدا۔ اصل گل ایہہ اے کہ جے عوام چاہندے نیں کہ نویں صوبے بنن، تاں حکومت نوں عوامی رائے اگے سر جھکا دینا چاہیدا اے یا نویاں چوناں ول جانا چاہیدا اے۔
پاکستان پیپلز پارٹی دے سیکرٹری جنرل نیئر حسین بخاری نے آکھیا اے کہ صوبیاں بارے جیہڑیاں گلاں ہو رہیاں نیں، اوہدا متعلقہ فورم پارلیمنٹ اے۔ ہن تک قومی اسمبلی تے سینیٹ وچ ایس طرح دی کوئی گل نئیں ہوئی۔ جے عوام دی رائے سامنے آندی اے تے آئین دے مطابق نویں صوبے بندے نیں، تاں کسے نوں اعتراض نئیں ہونا چاہیدا۔
انہاں آکھیا کہ ایہہ اٹھارھویں ترمیم توں وی وڈا کم اے، کیوں جو سینیٹ دیاں نشستاں تبدیل ہون گیاں۔ ایس معاملے اُتے گل اوہدوں ہو سکدی اے جدوں ایہہ وفاقی کابینہ وچ آوے گا۔
نیئر بخاری نے آکھیا کہ ریفرنڈم دے ذریعے آئین وچ ترمیم نئیں ہو سکدی۔ آئین واضح اے کہ وزیراعظم کابینہ دی منظوری نال ریفرنڈم دا معاملہ پہلے پارلیمنٹ دے مشترکہ ایوان دے سامنے رکھن گے۔ جے اوتھوں منظوری مل گئی تاں ایہہ معاملہ منظوری لئی صدر کول جائے گا۔ پیپلز پارٹی اپنا فیصلہ اوہدوں کرے گی جدوں ایہہ معاملہ اوہناں دے سامنے رکھیا جائے گا۔
