سڑکاں بناؤن لئی حکومت نوں عدالت وچ گھسیٹاں گا: حسینٰ الٰہی
اقتدار ہمیشہ نئیں رہندا، 11 ارب روپے دا جہاز ضروری سی یا گجرات دیاں سڑکاں؟ حکومت دے کرتوت ویکھ کے سر چکرا جاندا اے، اللہ ساڈی انہاں توں جان چھڑاوے: وجاہت حسین
ٹانڈہ، جلالپور جٹاں (سٹی رپورٹر، نامہ نگار) مسلم لیگ (ق) دے ایم این اے چودھری حسین الٰہی نے آکھیا اے کہ ٹانڈہ سرخپور روڈ دی حالت ویکھ کے افسوس ہوندا اے۔ چار سال توں ایس منصوبے اُتے کوئی کم نئیں ہو سکیا۔ ایہہ سڑکاں چودھری پرویز الٰہی نے اپنے دور وچ منظور کروائیاں سن، پر ایس دی سزا ساڈا علاقہ بھگت رہیا اے۔
قلعہ اسلام نگر وچ جلسے نوں خطاب کردیاں حسین الٰہی نے آکھیا کہ 11 ارب روپے دا جہاز زیادہ ضروری سی یا ساڈے علاقے دیاں سڑکاں؟ پرسوں وزیراعلیٰ نے آکھیا سی کہ سالک حسین نوں عدالتاں وچ گھسیٹاں گی۔ میرا تہاڈے نال وعدہ اے کہ ان شاء اللہ انہاں سڑکاں دی بحالی تے تعمیر لئی پوری حکومت نوں عدالتاں وچ گھسیٹاں گا۔
انہاں آکھیا کہ گجرات شہر وچ پچھلے دناں بارشاں دوران واسا دیاں ٹیمیں مشینری نال پانی کڈھ کے اپنی کرپشن چھپاندیاں رہیاں۔ اقتدار ہمیشہ نئیں رہندا، اج جیہڑیاں ناانصافیاں کیتیاں جا رہیاں نیں، ان شاء اللہ ساریاں دا حساب ہووے گا۔
سابق وفاقی وزیر چودھری وجاہت حسین نے آکھیا کہ موجودہ حکومت دے کرتوت ویکھ کے سر چکرا جاندا اے کہ انہاں نے کل کسے نوں جواب وی نئیں دینا۔ ایویں لگدا اے کہ نہ ایہہ اللہ توں ڈردے نیں، نہ کسے دا سامنا کرن دی فکر اے تے نہ ہی انہاں نوں عوام دا احساس اے۔ بس ہر پاسے ’’لٹی جاؤ، دبی جاؤ‘‘ دی مہم چلائی ہوئی اے۔
حکومتی معاملے بارے تبصرہ کردیاں انہاں آکھیا کہ پنجابی محاورہ اے، ’’اندھی پئے تے کتی چٹے‘‘۔ جو مرضی کرو، جہاز خرید لو، چن اُتے جا کے پلاٹ خرید لو، کوئی پچھن والا نئیں۔
وجاہت حسین نے آکھیا کہ اللہ تعالیٰ چنگا دور لے آوے تے ساڈی انہاں توں جان چھڑاوے۔
