اہم عہدیاں اُتے رہے، فیر گجرات دی حالت کیوں نہ بدلی؟: عظمیٰ
پرویز الٰہی دے دور وچ وائٹ پیپر منصوبیاں دے فنڈ جاری ہوئے، پر کم ہواواں وچ ہوندا رہیا، تہاڈے پورے ٹبر دیاں لمبیاں کہانیاں نیں، آکھو گی تاں ساری سنا دیواں گی: حسین الٰہی دے بیان اُتے ردعمل
لاہور (مانیٹرنگ ڈیسک) وزیر اطلاعات عظمیٰ بخاری نے چودھری شجاعت دے بھتیجے حسین الٰہی دے بیان اُتے ردعمل دیندیاں آکھیا کہ کئی سال مختلف عہدیاں اُتے رہن دے باوجود وی تسی گجرات دی حالت نئیں بدل سکے۔ لاہور بارے گل کردیاں شرم نئیں آندی؟ ڈپٹی وزیراعظم، وزیراعلیٰ، سپیکر، وفاقی تے صوبائی وزیر ہون دے باوجود تسی گجرات لئی کچھ کیوں نئیں کر سکے؟ پہلے ایس سوال دا جواب دیو۔
سماجی رابطے دی ویب سائٹ ایکس اُتے عظمیٰ بخاری دا کہنا سی کہ سانوں پتا اے کہ مریم نواز پنجاب وچ جیہڑے کم کر رہیاں نیں، اوہدی تکلیف کجھ لوکاں نوں بہت زیادہ ہو رہی اے۔ پنجاب دے عوام ہر ضمنی الیکشن وچ مریم نواز دی خدمت دی سیاست نوں مینڈیٹ دے رہے نیں، پر کجھ لوکاں توں ایہہ گل ہضم نئیں ہو رہی۔
انہاں آکھیا کہ تاریخ وچ پہلی واری مریم نواز دی حکومت نے گجرات لئی 12 ارب روپے دے فنڈ جاری کیتے۔ انہاں 12 ارب روپیاں نال گجرات وچ درجنوں منصوبے شروع کیتے گئے، جنہاں وچ گجرات دا میگا سیوریج پلان وی شامل اے۔
وزیراعلیٰ ولوں ہن حال ہی وچ 9 ارب 80 کروڑ روپے دا گجرات سرگودھا روڈ منصوبہ شروع کیتا گیا، جس دے تحت 94.30 کلومیٹر سڑک دی تعمیر تے بحالی کیتی جائے گی، جدوں کہ منڈی بہاؤالدین وچ 27.90 کلومیٹر سڑک نوں دو رویہ بنایا جائے گا۔
عظمیٰ بخاری نے آکھیا کہ پرویز الٰہی دے دور وچ گجرات لئی وائٹ پیپر منصوبے شروع کیتے گئے۔ انہاں منصوبیاں دے فنڈ پہلے جاری ہوئے تے منصوبے ہواواں وچ بندے رہے۔ تہاڈے پورے ٹبر دیاں تاں لمبیاں چوڑیاں کہانیاں نیں، کسے وی ویلے آکھو گے تاں ساری سنا دیواں گی۔
