چیئرمین واپڈا دا تربیلا حادثے والی تھاں دا دورہ، انکوائری دا حکم
فوری اقدامات تے عملدرآمد شروع، ابتدائی رپورٹ وزارتِ آبی وسائل نوں بھجوا دتی گئی
تربیلا دے مین ڈیم تے کسے وی ہور اہم سٹرکچر نوں کوئی خطرہ نہیں، واپڈا دی ٹیم متفق
لاہور: تربیلا توسیعی منصوبے وچ پیش آون والے حادثے دا وزیرِ آبی وسائل تے وزیراعظم آفس نے نوٹس لے لیا اے۔ واقعے دیاں وجوہات معلوم کرن تے تحقیقات کراؤن دا فیصلہ کیتا گیا اے۔
چیئرمین واپڈا لیفٹیننٹ جنرل (ر) محمد سعید نے تربیلا پنجویں توسیعی پن بجلی منصوبے دا دورہ کیتا۔ انہاں اِن ٹیک سٹرکچر، ٹنل، پاور ہاؤس تے ہور اہم تعمیراتی تھاواں دا تفصیلی جائزہ لیا تے پراجیکٹ آفس وچ اجلاس دی صدارت کیتی۔
اجلاس وچ واقعے دیاں ممکنہ وجوہات تے ایسی صورتحال نال نمٹن لئی قلیل، درمیانی تے طویل مدتی اقدامات دا تفصیلی جائزہ لیا گیا۔ اجلاس وچ فوری نوعیت دے اقدامات نوں وی حتمی شکل دتی گئی۔ منصوبے تے فوری اقدامات اُتے عملدرآمد شروع کیتا جا چکیا اے۔
ایس توں علاوہ کنسلٹنٹس، کنٹریکٹر تے واپڈا دی ٹیم اپنے اپنے جائزیاں وچ ایس گل تے متفق پائے گئے کہ تربیلا دے مین ڈیم تے کسے وی ہور اہم سٹرکچر نوں کسے قسم دا خطرہ نہیں۔
چیئرمین واپڈا نے کنسلٹنٹس نوں ہدایت کیتی کہ واقعے دے سارے پہلوؤاں بارے جامع رپورٹ جلد توں جلد پیش کیتی جائے۔ انہاں کنسلٹنٹس، کنٹریکٹر تے واپڈا دی پراجیکٹ ٹیم نوں ہدایت دتی کہ بحالی دے اقدامات اُتے فوری عمل کیتا جائے تے نال ہی ہنگامی لائحہ عمل نوں وی حتمی شکل دتی جائے، تاں جو منصوبے دی مجموعی تکمیل وچ واقعے دی وجہ نال ممکنہ تاخیر نوں گھٹ توں گھٹ رکھیا جا سکے۔
انہاں واقعے دی جامع تحقیقات لئی محکمانہ انکوائری دا حکم وی دتا۔
وزارتِ آبی وسائل نے وی واپڈا توں واقعے دی ابتدائی جائزہ رپورٹ منگی سی، جیہڑی وزارت نوں بھجوا دتی گئی اے۔
