کینسر دے مریضاں لئی 5 ارب دیاں ادویات خریدن دا فیصلہ

26 ادویات لئی اڑھائی ارب روپے، بولیاں پرسوں کھلن گیاں، مریضاں نوں مفت ملن گیاں

گزشتہ مالی سال 8 ادویات دی خریداری، لکھاں گولیاں تے ہزاراں انجیکشن تقسیم

لاہور: حکومتِ پنجاب نے کینسر دے مریضاں لئی مالی سال 2025-26 تے 2026-27 وچ 5 ارب روپے دیاں ادویات خریدن دا فیصلہ کر لیا اے۔ وزیراعلیٰ پنجاب مریم نواز دی ہدایت اُتے مریضاں نوں ایہہ ادویات بالکل مفت فراہم کیتیاں جان گیاں۔ محکمہ صحت نے کینسر دیاں ادویات دی فراہمی دا دائرہ ہور وسیع کر دتا اے۔

تفصیلات مطابق رواں مالی سال لئی کینسر دیاں 26 ادویات خریدن دا عمل شروع کر دتا گیا اے، جنہاں دی تخمینہ لاگت 2 ارب 60 کروڑ روپے اے۔ انہاں ادویات دی خریداری لئی بولیاں کھلن دی تاریخ 13 نومبر 2026 مقرر کیتی گئی اے۔

ایس اقدام نال لیوکیمیا، لمفوما، بریسٹ کینسر، کولوریکٹل تے پھیپھڑیاں دے کینسر سمیت ہور قسماں دے کینسر دا علاج ہن ہور آسان ہووے گا۔ کینسر دیاں کجھ ادویات ڈی ٹی ایل ٹیسٹنگ توں بعد آئندہ دناں وچ سرکاری ٹیچنگ ہسپتالاں نوں فراہم کیتیاں جان گیاں۔

دوجے پاسے مالی سال 2025-26 وچ کینسر دیاں 8 اہم ادویات دی کامیاب خریداری تے تقسیم وی مکمل کر لئی گئی اے۔

کینسر سینٹرز نوں ایمیٹینب 100 ملی گرام دیاں 50 لاکھ 16 ہزار 560 گولیاں، ڈوکسوروبیسن 50 ملی گرام دے 35 ہزار 200 انجیکشن تے پیکلیٹیکسل 150 ملی گرام دے 21 ہزار 880 انجیکشن تقسیم کیتے گئے۔

ایس طرح کاربوپلاٹن 450 ملی گرام دے 15 ہزار 400 انجیکشن تے ٹراسٹوزوماب 440 ملی گرام دے 1 ہزار 40 انجیکشن ہسپتالاں نوں فراہم کیتے گئے۔ نیلوٹینب کیپسول دیاں 14 لاکھ 86 ہزار 912 خوراکاں وی مریضاں لئی تقسیم کیتیاں گئیاں۔

وزیرِ صحت خواجہ سلمان رفیق نے آکھیا کہ کینسر دے مریضاں نوں ارباں روپے دیاں ادویات مفت فراہم کرنا انتہائی خوش آئند اے۔ لاہور وچ جدید ترین نواز شریف انسٹی ٹیوٹ آف کینسر ٹریٹمنٹ اینڈ ریسرچ دی تعمیر تے تکمیل دا کم جاری اے۔

سیکرٹری محکمہ سپیشلائزڈ ہیلتھ کیئر عظمت محمود نے آکھیا کہ ادویات دی خریداری یقینی بنائی جا رہی اے۔