مکہ معاہدہ شراکت داری اے، کسے ملک دے خلاف نہیں: اسحاق ڈار
امریکہ تے ایران دے دوبارہ مذاکرات لئی کوششاں جاری رکھاں گے: وزیر خارجہ
اسلام آباد: نائب وزیراعظم تے وزیر خارجہ اسحاق ڈار نے آکھیا اے کہ مکہ معاہدہ سعودی عرب تے ترکیہ دے نال پاکستان دی شراکت داری دی علامت اے، ایہہ کسے ملک دے خلاف نہیں۔ پاکستان امریکہ تے ایران نوں دوبارہ مذاکرات دی میز اُتے لیاؤن لئی سفارتی کوششاں جاری رکھے گا، جدکہ تنازع جموں و کشمیر دا اقوام متحدہ دی سلامتی کونسل دیاں قرارداداں دے مطابق منصفانہ حل خطے وچ پائیدار امن لئی ضروری اے۔
اسلام آباد پالیسی ریسرچ انسٹیٹیوٹ دے زیرِ اہتمام عالمی کانفرنس ’’مارگلہ ڈائیلاگ 2026‘‘ نال خطاب کردیاں اسحاق ڈار نے آکھیا کہ سانجھے چیلنجز دا مقابلہ کرن لئی باہمی تعاون تے کثیرالجہتی سفارتکاری نوں فروغ دین دی ضرورت اے۔
عالمی سلامتی دا نظام شدید دباؤ دا شکار اے، وڈیاں طاقتاں دی کشمکش نال تصادم تے غلط اندازیاں دا خطرہ ودھ رہیا اے، جدکہ فوجی طاقت دے استعمال نال سفارتکاری دی گنجائش محدود ہو رہی اے۔ اقوام متحدہ ورگے عالمی اداریاں نوں ہور مؤثر کردار ادا کرنا پئے گا۔
اُنہاں آکھیا کہ چین دے نال سٹریٹجک شراکت داری پاکستان دی خارجہ پالیسی دا بنیادی ستون اے، جدکہ امریکہ، سعودی عرب، ترکیہ، جاپان، مصر، متحدہ عرب امارات تے ملائیشیا دے نال تعلقات وی اہمیت رکھدے نیں۔
پاکستان اپنی خودمختاری تے قومی مفادات دا تحفظ یقینی بناندے ہوئے علاقائی امن تے معاشی خوشحالی لئی کوششاں جاری رکھے گا۔
وزیر خارجہ نے آکھیا کہ خلیج تے بحیرہ احمر وچ عدم استحکام عالمی تجارت، توانائی دی فراہمی تے معیشتاں نوں متاثر کر سکدا اے۔ شدید محاذ آرائی دوران وی رابطیاں دے راستے کھلے رہنے چاہیدے نیں، کیونکہ سلامتی دا بحران معاشی جھٹکے وچ تبدیل ہو کے خوراک تے ایندھن دیاں قیمتاں وچ اضافے دا سبب بن سکدا اے۔
اسحاق ڈار نے مسئلہ کشمیر، سندھ طاس معاہدے تے افغانستان توں پیدا ہون والے سلامتی دے خطرات اُتے پاکستان دا مؤقف دہراندے ہوئے آکھیا کہ علاقائی استحکام بین الاقوامی معاہدیاں دے احترام تے تنازعات دے پُرامن حل نال جڑیا ہویا اے۔
اُنہاں آکھیا کہ مئی 2025 وچ بھارتی جارحیت دے جواب وچ آپریشن بنیان مرصوص پاکستان دی خودمختاری دے دفاع دے عزم تے صلاحیت دا ثبوت سی۔ افغانستان دی سرزمین پاکستان خلاف دہشت گردانہ سرگرمیاں لئی استعمال نہیں ہونی چاہیدی۔
دریں اثنا نائب وزیراعظم تے وزیر خارجہ اسحاق ڈار نال سابق امریکی اسسٹنٹ سیکرٹری رابن رافیل نے اسلام آباد وچ ملاقات کیتی، جس دوران پاکستان تے امریکہ دے تعلقات سمیت باہمی دلچسپی دے معاملے اُتے تبادلہ خیال ہویا۔
اسحاق ڈار نے دوطرفہ تعلقات وچ مثبت پیش رفت دا خیرمقدم کردیاں تعاون نوں ہور مضبوط بناؤن لئی مسلسل رابطیاں تے تعمیری سفارتکاری دی اہمیت اُتے زور دتا۔
دونواں پاسیاں نے تھنک ٹینکس تے تعلیمی اداریاں وچ رابطے تے تبادلے ودھاؤن اُتے اتفاق کیتا۔
