افغان نیشنل آرمی توں تربیت یافتہ افغان دہشت گرد گرفتار
حکمت اللہ نے کمانڈو تربیت حاصل کی، جلال آباد وچ طالب علم نوں خودکش حملے لئی تیار کیتا، افغان آرمی دے خاتمے توں بعد مدرسیاں وچ اپنی صلاحیتاں ورتیاں: ایڈیشنل آئی جی
پشاور: سکیورٹی فورسز نے ملک وچ دہشت گردی دی منصوبہ بندی دے الزام وچ اک افغان دہشت گرد نوں گرفتار کر لیا۔
پشاور وچ ایڈیشنل آئی جی پولیس عباس احسن تے سیکرٹری اطلاعات ایریا ڈویلپمنٹ سیکٹر محمود جان نے پریس کانفرنس دوران افغان دہشت گرد دی گرفتاری دی تصدیق کیتی۔
ایڈیشنل آئی جی پولیس نے آکھیا کہ اسیں دہشت گردی دا ڈٹ کے مقابلہ کیتا اے تے اگے وی کردے رہاں گے۔ انہاں دا کہنا سی کہ دہشت گردی لئی سرحد پار افغان سرزمین ورتی جاندی رہی اے۔
ایڈیشنل آئی جی پولیس نے دسیا کہ سانوں اک اہم کامیابی ملی اے۔ سکیورٹی فورسز تے قانون نافذ کرن والے اداریاں نے انٹیلی جنس دی بنیاد اُتے آپریشن کردیاں اک دہشت گرد خارجی حکمت اللہ عرف حمزہ ولد نور محمد نوں گرفتار کر لیا۔ ایہ دہشت گرد تیراہ وادی دے راستے آیا سی تے اوہنوں پشاور دے نیڑے گرفتار کیتا گیا۔
انہاں آکھیا کہ انسانی ذرائع، انٹیلی جنس تے الیکٹرانک نگرانی دے مختلف طریقے ورت کے دہشت گرد نوں گرفتار کیتا گیا۔
گرفتار دہشت گرد بارے تفصیلات دیندے ہوئے ایڈیشنل آئی جی نے دسیا کہ حکمت اللہ نوں 7 نومبر نوں گرفتار کیتا گیا تے اوہ افغانستان دے صوبے پکتیا دے علاقے چمکنی دے پنڈ منگیار نال تعلق رکھدا اے۔
گرفتار دہشت گرد توں تفتیش دوران کئی انکشافات ہوئے نیں۔ سانوں پتا لگیا اے کہ پاکستان تے افغانستان وچ اوہدے کون کون سہولت کار رہے نیں۔ اوہنے افغانستان وچ کتھے کتھے تربیت حاصل کیتی تے پاکستان وچ دہشت گردی دی منصوبہ بندی کتھوں کیتی۔
عباس احسن نے دسیا کہ ایہ خارجی پہلے افغان نیشنل آرمی وچ وی کم کر چکیا اے تے تین مہینیاں دی فوجی تربیت حاصل کر چکیا اے۔ ایس توں علاوہ اوہنے تین مہینے افغان آرمی دے نال کمانڈو تربیت وی حاصل کیتی۔
انہاں دا کہنا سی کہ افغان آرمی دے خاتمے توں بعد حکمت اللہ نے مختلف مدرسیاں وچ اپنی صلاحیتاں ورتدے ہوئے اتھے دوبارہ تربیت شروع کر دِتی تے لوکاں نال رابطے قائم رکھے، تاں جو پاکستان وچ دوبارہ دہشت گردی پھیلا سکے۔
گرفتار دہشت گرد بارے مزید دسدیان ایڈیشنل آئی جی نے آکھیا کہ جلال آباد دے نیڑے خالد بن ولید مدرسے وچ ایس دہشت گرد نے عکرمہ ناں دے اک طالب علم نوں خودکش حملہ آور دی تربیت دِتی۔
انہاں دعویٰ کیتا کہ گرفتار دہشت گرد دے سابقہ گل بہادر گروپ نال تعلقات تے رابطے رہے نیں، جدکہ اوہ ایس گروپ دے اک کمانڈر منصور دا ذاتی محافظ وی رہ چکیا اے۔
