ناجائز قبضہ کرن والے دا سرکاری زمین اُتے کوئی قانونی حق نہیں ہوندا: ہائیکورٹ
لاہور: لاہور ہائیکورٹ نے سرکاری زمین اُتے قابض شخص دی اپیل خارج کردیاں قرار دتا اے کہ حکومت اپنی زمین دے استعمال دا طریقہ اپنی مرضی نال تبدیل کر سکدی اے۔
عدالت نے آکھیا کہ ناجائز قابض نوں سرکاری زمین دے استعمال اُتے اعتراض کرن دا کوئی حق حاصل نہیں۔
جسٹس چوہدری محمد اقبال تے جسٹس مزمل اختر شبیر اُتے مشتمل دو رکنی بینچ نے مسعود احمد دی اپیل اُتے چھ صفحیاں اُتے مشتمل فیصلہ جاری کیتا، جس نوں عدالتی نظیر قرار دتا گیا اے۔
جسٹس مزمل اختر شبیر نے پاکپتن وچ 76 کنال سرکاری زمین دی سکیم تبدیل کرن دا فیصلہ برقرار رکھدیاں قرار دتا کہ ناجائز قابض متاثرہ فریق نہیں ہوندا، سرکاری زمین اُتے قبضہ کسے شخص نوں کوئی قانونی حق نہیں دیندا۔
فیصلے وچ آکھیا گیا کہ سابق عدالتی حکم وچ کیتیاں گئیاں عارضی نوعیت دیاں گلاں توں کوئی مستقل حق پیدا نہیں ہوندا۔
عدالت نے سنگل بینچ دا فیصلہ درست قرار دیندیاں اپیل مسترد کر دتی۔ عدالت نے قرار دتا کہ مذکورہ سرکاری زمین ہن نمبرداری سکیم دے تحت دتی جاوے گی۔
