پٹرولیم دیاں قیمتاں گھٹ گئیاں، پبلک ٹرانسپورٹ دے کرائے گھٹ نہ سکے
ٹرانسپورٹ دے کرایاں گھٹاؤن دے حکومتی اعلان اُتے عملدرآمد نہ ہو سکیا، ٹرانسپورٹ دے کرائے فوری طور اُتے ہور گھٹائے جان گے: وزیر ٹرانسپورٹ
لاہور: پٹرولیم مصنوعات دیاں قیمتاں وچ مسلسل کمی دے باوجود پبلک ٹرانسپورٹ استعمال کرن والے مسافراں نوں ہن تک اوہناں دے تناسب نال ریلیف نہیں مل سکیا۔
لاہور توں ہور شہراں نوں جان والی ٹرانسپورٹ دے کرایاں وچ کمی دے حکومتی اعلان دے باوجود عملی صورتحال وکھری نظر آ رہی اے۔ کجھ مسافراں دے مطابق کرائے پہلے وانگ ای وصول کیتے جا رہے نیں، جدکہ کجھ دا کہنا اے کہ معمولی کمی تے ہوئی اے، پر پٹرول تے ڈیزل دیاں قیمتاں وچ کمی دے مقابلے وچ ایہ ریلیف ناکافی اے۔
دوجے پاسے صوبائی وزیر ٹرانسپورٹ اینڈ ماس ٹرانزٹ بلال اکبر خان نے پٹرولیم مصنوعات دیاں قیمتاں وچ ہور کمی نوں خوش آئند قرار دیندیاں کرایاں وچ مزید کمی لئی اقدامات دی ہدایت کر دتی اے۔
وزیر ٹرانسپورٹ دے مطابق پٹرولیم مصنوعات دیاں قیمتاں وچ کمی دے تناسب نال ٹرانسپورٹ دے کرائے فوری طور اُتے ہور گھٹائے جان گے۔
بلال اکبر خان نے متعلقہ حکام نوں مقررہ توں ودھ کرایہ وصول کرن والے ٹرانسپورٹرز خلاف کارروائیاں تیز کرن تے روزانہ دی بنیاد اُتے رپورٹ پیش کرن دی ہدایت وی دتی اے۔
وزیر ٹرانسپورٹ دا کہنا اے کہ مسافراں توں مقررہ کرائے توں ودھ وصولی کسے صورت برداشت نہیں کیتی جاوے گی۔
