قوم دے مسئلیاں اُتے سیاست ہووے تے سارے مسئلے ختم ہو سکدے نیں، حافظ نعیم
2 سالاں وچ 20 لکھ نوجواناں نوں آئی ٹی دی تعلیم دیواں گے، روزگار دا وی بندوبست کر رہے آں
الخدمت ولوں مختلف شعبیاں دے 10 اداریاں نال مفاہمت دیاں یادداشتاں اُتے دستخط کیتے گئے۔
کراچی: امیر جماعت اسلامی حافظ نعیم الرحمن نے آکھیا اے کہ بنو قابل پروگرام دا دائرہ پورے ملک وچ پھیل چکیا اے۔ اسیں اگلے 2 سالاں وچ 20 لکھ نوجواناں نوں آئی ٹی دی تعلیم دیواں گے۔ انہاں طلبہ نوں نہ صرف آئی ٹی دی تعلیم دتی جاوے گی بلکہ انہاں لئی روزگار دا بندوبست وی کیتا جا رہیا اے۔
نوجواناں نوں مایوس ہون یا ملک چھڈ کے جان دی لوڑ نئیں، اوہ اپنی صلاحیتاں نوں آئی ٹی دے شعبے وچ ورت کے اپنی تقدیر بدلّن۔
گزشتہ روز اک مقامی ہوٹل وچ بنو قابل پروگرام دے تحت ڈیجیٹل پاکستان مشاورتی سیشن نال بطور مہمانِ خصوصی خطاب کردیاں انہاں مزید آکھیا کہ ساڈے نوجوان باصلاحیت نیں تے پاکستان وچ بہت صلاحیت موجود اے۔ نوجواناں نوں مواقع فراہم کرن دی لوڑ اے۔ پہلی واری جدوں اسیں ایہ پروگرام شروع کیتا تاں یقین نئیں سی کہ ایہنا مقبول ہووے گا۔
انہاں آکھیا کہ پاکستان وچ قوم دے مسئلیاں اُتے سیاست نئیں ہوندی، جے قوم دے مسئلیاں اُتے سیاست ہووے تے مسئلے ختم ہو سکدے نیں۔
حافظ نعیم نے سیشن وچ موجود اداریاں دے سربراہاں نوں آکھیا کہ جے اوہ تعاون کرن تے اسیں اس پروگرام نوں بہت اگے لے جا سکدے آں۔ نوجواناں نوں آئی ٹی دے شعبے وچ اگے لیاواں گے تے انہاں دی سرپرستی کراں گے، جس نال آئی ٹی برآمدات وچ اضافہ ہووے گا تے ملکی معیشت مستحکم ہووے گی۔
اس موقع اُتے الخدمت ولوں بینکنگ (فنانشل)، صحت، مینوفیکچرنگ، آئی ٹی تے سروسز دے شعبیاں نال تعلق رکھن والے 10 اداریاں دے نال مفاہمت دیاں یادداشتاں اُتے دستخط کیتے گئے۔
معاہدے دے مطابق کمپنیاں بنو قابل دے طلبہ نوں ملازمتاں، انٹرن شپ تے مینٹورشپ فراہم کرن گیاں، نال ای پروگرام وچ مستقل بنیاداں اُتے بہتری لئی ایڈوائزری بورڈ دی معاونت وی کرن گیاں، جدکہ الخدمت انہاں کمپنیاں نوں انہاں دیاں ضرورتاں دے مطابق ہنرمند طلبہ تے طالبات فراہم کرے گی۔
