ای سی او اجلاس علاقائی سفارت کاری تے معاشی تعاون دا اہم موقع اے

پاکستان نوں وسطی ایشیا دیاں منڈیاں تک رسائی، علاقائی تجارت تے توانائی اُتے توجہ دین دی لوڑ اے۔ اجلاس دی کامیابی دا دارومدار سانجھے اعلامیے دی بجائے عملی نتیجیاں اُتے ہووے گا، تجزیہ کاراں دی رائے۔

اسلام آباد: ای سی او وزرائے خارجہ کونسل دا اجلاس پاکستان لئی علاقائی سفارت کاری، معاشی تعاون تے جغرافیائی سیاسی اہمیت دے حوالے نال اک اہم موقع قرار دِتا جا رہیا اے۔

1985 وچ پاکستان، ایران تے ترکیہ دے اشتراک نال قائم ہون والی ای سی او 10 ملکاں اُتے مشتمل تنظیم اے، جس دا جغرافیائی دائرہ جنوبی، وسطی تے مغربی ایشیا تک پھیلیا ہویا اے۔ لگ بھگ 50 کروڑ آبادی والا ایہ خطہ قدرتی وسائل، توانائی دے ذخائراں تے بین الاقوامی تجارتی راستیاں دے لحاظ نال غیر معمولی اہمیت رکھدا اے۔

پاکستان لئی ای سی او دی اہمیت اس دے سٹریٹجک محلِ وقوع وچ لُکی ہوئی اے۔ کراچی، پورٹ قاسم تے گوادر دیاں بندرگاہاں وسطی ایشیا دیاں خشکی وچ گھرِیاں ریاستاں نوں بحیرہ عرب تے عالمی منڈیاں تک رسائی فراہم کرن دی صلاحیت رکھدیاں نیں۔

ایس تناظر وچ چین پاکستان اقتصادی راہداری (سی پیک)، پاکستان، افغانستان تے ازبکستان دے درمیان مجوزہ ریلوے رابطہ تے ایران دے راستے علاقائی تجارت خاص اہمیت رکھدے نیں۔

ماہراں دے مطابق عالمی طاقتاں دے درمیان ودھدی ہوئی مسابقت دے تناظر وچ ای سی او، چین، روس، ایران تے ترکیہ سمیت علاقائی ملکاں دے درمیان اقتصادی تعاون دا مؤثر پلیٹ فارم بن سکدی اے۔

اسلام آباد نوں ایس موقعے دا فائدہ چُکدیاں علاقائی تجارتی رکاوٹاں ختم کرن، کسٹمز دے نظام وچ ہم آہنگی پیدا کرن، ٹرانزٹ سہولتاں، سرمایہ کاری تے سانجھے اقتصادی منصوبیاں لئی قابلِ عمل اقدامات اگے ودھانے چاہیدے نیں۔

تجزیہ کاراں دے مطابق اجلاس دی اصل کامیابی دا فیصلہ سانجھے اعلامیے دی بجائے عملی نتیجیاں توں ہووے گا۔

ب

اپنا تبصرہ گھلو