مکہ دفاعی اتحاد دا اجلاس ایس مہینے اسلام آباد وچ ہووے گا: اتحاد دا دائرہ صرف تِن ملکاں تک محدود رکھن دا ارادہ نہیں، انتظامی تے ادارہ جاتی ڈھانچے دی تکمیل توں بعد بنیادی اصولاں نال متفق ملکاں دی شمولیت اُتے غور کیتا جائے گا: اسحاق ڈار

افغانستان دہشت گرد عناصر دے خلاف کارروائی کرے تاں پاکستان تعاون، حمایت تے مدد لئی تیار اے: نائب وزیراعظم، اقتصادی تعاون تنظیم دا 30واں اجلاس ختم، مشترکہ اعلامیہ جاری

رکن ملکاں دے درمیان علاقائی تعاون، رابطیاں دے فروغ تے معاشی انضمام لئی پرعزم آں: شہباز شریف، ای سی او وزراء کونسل دے اجلاس دے کامیاب انعقاد نوں سراہیا، وفود نال وی ملاقاتاں

اسلام آباد: نائب وزیراعظم تے وزیر خارجہ سینیٹر محمد اسحاق ڈار نے پاکستان دی 2026ء تے 2027ء لئی اقتصادی تعاون تنظیم (ای سی او) دی صدارت دے ایجنڈے دا اعلان کردیاں آکھیا کہ پاکستان دی صدارت دا بنیادی مقصد علاقائی تعاون، تجارت تے سرمایہ کاری نوں فروغ دینا تے وسطی تے جنوبی ایشیا دے درمیان رابطیاں نوں مضبوط بنانا اے۔

ای سی او ویژن 2035 متعارف کروا دتا گیا اے۔ مکہ مشترکہ دفاعی معاہدے دی ایپکس کمیٹی دا اجلاس وی ایس مہینے دے آخر وچ اسلام آباد وچ ہون دی توقع اے۔ ایس خطے دا اپنا سکیورٹی نظام ہونا چاہیدا اے تے مکہ مشترکہ دفاعی معاہدہ ایس سلسلے دی اک کڑی اے۔ ایہ معاہدہ اقوام متحدہ دے چارٹر دے عین مطابق اے۔

ایہناں خیالات دا اظہار انہاں اسلام آباد وچ اقتصادی تعاون تنظیم (ای سی او) دی وزرائے خارجہ کونسل دے 30ویں اجلاس دے اختتام اُتے وفاقی وزیر اطلاعات عطا اللہ تارڑ تے ای سی او دے سیکرٹری جنرل ڈاکٹر اسد مجید خان دے نال مشترکہ پریس کانفرنس نوں خطاب کردیاں کیتا۔

اسحاق ڈار نے واضح کیتا کہ ایہ نہیں کہ مکہ مشترکہ دفاعی معاہدے اُتے صرف تِن ملکاں دی اجارہ داری رہے گی، بلکہ ہور ملکاں دی شمولیت نال معاملات ہور بہتر ہون گے۔ معاہدے دا مقصد رکن ملکاں دے درمیان دفاعی تعاون نوں فروغ دینا اے۔ ایس معاہدے دے تحت کسے اک رکن ملک اُتے حملے نوں سارے رکن ملکاں اُتے حملہ تصور کیتا جائے گا۔

اس اتحاد دا دائرہ صرف تِن ملکاں تک محدود رکھن دا ارادہ نہیں، انتظامی تے ادارہ جاتی ڈھانچے دی تکمیل توں بعد اوہناں ملکاں دی شمولیت اُتے غور کیتا جائے گا جیہڑے ایس دے بنیادی اصولاں نال اتفاق رکھدے ہون۔

اسحاق ڈار نے آکھیا کہ افغان عبوری حکومت نوں تسلیم کرن دے حوالے نال پاکستان دا مؤقف واضح اے۔ ای سی او دے ایس فورم اُتے افغان نمائندگی موجود نہیں سی تے افغانستان دا پرانا جھنڈا استعمال کیتا گیا۔

نائب وزیراعظم نے آکھیا کہ پاکستان لئی ایہ اعزاز دی گل اے کہ اوہ 2026ء تے 2027ء لئی تنظیم دی صدارت دیاں ذمہ واریاں نبھا رہیا اے۔ ایران 3 تے 4 دسمبر 2026ء نوں تنظیم دے 18ویں سربراہی اجلاس دی میزبانی کرے گا۔

ایران تے امریکہ دے درمیان جاری سفارتی کوششاں بارے سوال دے جواب وچ نائب وزیراعظم نے آکھیا کہ پاکستان نے مذاکراتی عمل نوں اگے ودھاؤن دیاں کوششاں نہیں چھڈیاں۔ اسلام آباد مفاہمتی یادداشت اُتے عملدرآمد دے ذریعے معاملات حل ہون دی امید رکھدا اے۔ پاکستان بہترین نتیجیاں لئی پرامید اے تے سفارتی کوششاں جاری رکھے گا۔

انہاں آکھیا کہ جے ای سی او تجارتی معاہدہ نافذ ہو جاندا اے تاں ایران اُتے امریکی پابندیاں دے تناظر وچ بین الاقوامی قوانین اُتے عمل کیتا جائے گا۔

افغانستان بارے سوال دے جواب وچ نائب وزیراعظم نے ہور آکھیا کہ پاکستان نوں افغانستان دے عوام یا عام شہریاں نال کوئی مسئلہ نہیں، بلکہ پاکستان دی تشویش دہشت گرد تنظیمواں تے اوہناں ولوں پاکستانی سرزمین اُتے کیتے جان والے حملیاں بارے اے۔

جے افغانستان دہشت گرد عناصر دے خلاف عملی کارروائی کردا اے تاں پاکستان اوہدے نال تعاون، حمایت تے مدد لئی تیار اے۔ پاکستان افغانستان نال تجارت، علاقائی رابطیاں تے اقتصادی تعاون دا خواہشمند اے، پر ایس لئی دہشت گردی دے مسئلے دا حل ضروری اے۔

افغانستان جے اک قدم اگے ودھائے گا تاں اسیں دو قدم اگے ودھن لئی تیار آں۔ اسیں آخر کدوں تک شہیداں دے جنازے چکدے رہواں گے؟

ایس توں پہلاں اسلام آباد وچ اقتصادی تعاون تنظیم دی وزارتی کونسل دے 30ویں اجلاس نوں خطاب کردیاں اسحاق ڈار نے آکھیا کہ پاکستان وسیع منڈیاں تک رسائی، مضبوط علاقائی ویلیو چینز تے نجی شعبے، خاص طور اُتے چھوٹے تے درمیانے درجے دے کاروباری اداریاں (ایس ایم ایز) دی ودھ توں ودھ شمولیت دی حمایت کرے گا۔

ایرانی وزیر خارجہ عباس عراقچی نے آکھیا کہ ای سی او اجلاس دے انعقاد اُتے پاکستان تے وزارت خارجہ دے شکرگزار آں۔ ای سی او نوں اجتماعی اقدامات، مضبوط تعاون تے مشترکہ حکمت عملی دا مؤثر پلیٹ فارم بنانا ہووے گا۔

امریکہ نے جارحیت، ٹارگٹ کلنگ تے ناکہ بندی دا راستہ اختیار کیتا۔ ایران دے اقدامات نوں گواڈری ملکاں دیاں حکومتاں یا عوام دے خلاف کارروائی نہ سمجھیا جائے۔

عباس عراقچی نے آکھیا کہ مقبوضہ فلسطین دی صورتحال انسانیت لئی شرمناک اے۔ غزہ وچ انسانی امداد دی بلا رکاوٹ فراہمی لئی اسرائیلی ناکہ بندی ختم کرائی جائے۔ اسرائیلی جیلّاں وچ تقریباً 10 ہزار فلسطینی قیدیاں دی حالت زار اُتے وی توجہ دین دی لوڑ اے۔

عباس عراقچی نے رکن ملکاں دے رہنماواں نوں 4 دسمبر 2026ء نوں تہران وچ ہون والے ای سی او دے 18ویں سربراہی اجلاس وچ شرکت دی دعوت دتی تے آکھیا کہ ایران اوہناں دی میزبانی دا منتظر اے۔

دوجے پاسے نائب وزیراعظم اسحاق ڈار نال اجلاس دے موقع اُتے ایرانی وزیر خارجہ سید عباس عراقچی تے ترکی دے نائب وزیر خارجہ موسیٰ کولاکلیکایا نے وکھ وکھ ملاقاتاں کیتیاں۔ ایس دوران برادرانہ تعلقات نوں ہور مضبوط بناؤن تے اعلیٰ سطح اُتے مسلسل رابطیاں دے ذریعے دوطرفہ تعاون نوں فروغ دین دے عزم دا اعادہ کیتا گیا۔

ایس توں پہلاں پاکستان دی زیر صدارت ہون والا اقتصادی تعاون تنظیم وزرائے خارجہ کونسل دا 30واں دو روزہ اجلاس اسلام آباد وچ ختم ہو گیا، جس توں بعد ’’اسلام آباد اعلامیہ‘‘ جاری کر دتا گیا۔

اعلامیے مطابق اجلاس وچ رکن ملکاں نے علاقائی اقتصادی تعاون، تجارت، سرمایہ کاری، توانائی، ٹرانسپورٹ، ڈیجیٹل رابطیاں تے پائیدار ترقی دے فروغ لئی مشترکہ کوششاں تیز کرن اُتے اتفاق کیتا، جدوں کہ تنظیم دے تحت اقتصادی تعاون دے سٹریٹجک اہداف 2035 نوں علاقائی انضمام تے مشترکہ خوشحالی لئی جامع لائحہ عمل قرار دتا گیا۔

ای سی او ویژن 2035 دی منظوری، علاقائی تجارتی راہداریوں، مشترکہ تجارتی زونز تے ڈیجیٹل معیشت دے فروغ اُتے زور دتا گیا۔

اعلامیے وچ پاکستان ولوں ای سی او رکن ملکاں لئی مسلسل سفارتی تعاون تے حالیہ ایران امریکہ کشیدگی دوران تناؤ گھٹاؤن لئی ثالثی دیاں کوششاں نوں سراہیا گیا۔

اجلاس وچ پاکستان ولوں 2026ء توں 2027ء لئی ای سی او دی صدارت سنبھالن دا خیرمقدم کیتا گیا۔

اعلامیے وچ 2035ء تک اقتصادی تعاون دے سٹریٹجک اہداف نوں ای سی او ویژن 2025 دیاں کامیابیاں نوں اگے ودھاؤن والا جامع فریم ورک قرار دیندے ہوئے آئندہ 18ویں ای سی او سربراہی اجلاس تہران وچ منعقد کرن دی اہمیت اُتے زور دتا گیا۔

ای سی او رکن ملکاں نے باہمی تجارت وچ اضافے، آزاد اقتصادی زونز دے قیام، مشترکہ صنعتی منصوبیاں، علاقائی ویلیو چینز تے چھوٹے تے درمیانے درجے دے کاروباراں دی معاونت اُتے اتفاق کیتا۔

اعلامیے وچ ای سی او تجارتی معاہدے (ECOTA) وچ اصلاحات تے ایس اُتے مؤثر عملدرآمد تیز کرن دی ضرورت اُتے زور دتا گیا۔

اعلامیے وچ ای سی او ٹرانزٹ ٹرانسپورٹ فریم ورک معاہدے اُتے مکمل عملدرآمد دی ضرورت اُتے زور دتا گیا، جدوں کہ 2026ء توں 2030ء لئی معدنیات دے شعبے وچ علاقائی تعاون دے پنج سالہ روڈ میپ نوں وی اہم پیش رفت قرار دتا گیا۔

اعلامیے وچ لاہور نوں 2027ء لئی ای سی او دا سیاحتی دارالحکومت نامزد کیتا گیا، جس توں بعد ترکمانستان دا شہر ماری 2028ء، کرکول 2029ء تے قازقستان دا شہر اکتاؤ 2030ء وچ ای سی او دے سیاحتی دارالحکومت ہون گے۔

اجلاس دے اختتام اُتے رکن ملکاں نے پاکستان تے وزیر خارجہ اسحاق ڈار نوں بہترین انتظامات اُتے خراج تحسین پیش کیتا۔ ای سی او دے سیکرٹری جنرل ڈاکٹر اسد ایم خان تے تہران وچ قائم تنظیم دے سیکرٹریٹ دی ٹیم دیاں تیاریواں تے معاونت نوں وی سراہیا گیا۔

اجلاس وچ ایس عزم دا اظہار کیتا گیا کہ رکن ملک علاقائی تعاون، اقتصادی انضمام، تجارت، سرمایہ کاری، رابطیاں تے پائیدار ترقی دے مشترکہ اہداف حاصل کرن لئی مل کے کم جاری رکھن گے۔

وزیراعظم شہباز شریف دیاں وفود نال ملاقاتاں

اسلام آباد: وزیراعظم محمد شہباز شریف نال اقتصادی تعاون تنظیم (ای سی او) دے رکن ملکاں دے وزرائے خارجہ، وفود دے سربراہاں تے او آئی سی دے سیکرٹری جنرل اسماعیل ولد الشیخ احمد نے ملاقات کیتی۔

پیر نوں وزیراعظم آفس توں جاری بیان مطابق وزیراعظم شہباز شریف نے اقتصادی تعاون تنظیم دے مہماناں دا خیرمقدم کردیاں ای سی او وزراء کونسل دے 30ویں اجلاس وچ شرکت اُتے اوہناں دا شکریہ ادا کیتا تے آکھیا کہ حکومت پاکستان رکن ملکاں دے درمیان علاقائی تعاون، رابطیاں دے فروغ تے معاشی انضمام لئی پرعزم اے۔

وزیراعظم نے ای سی او وزراء کونسل دے اجلاس دے کامیاب انعقاد نوں سراہیا تے اسلام آباد اعلامیے تے 2026ء توں 2035ء تک معاشی تعاون لئی طے کیتے گئے سٹریٹجک اہداف دی منظوری دا خیرمقدم کیتا۔

انہاں نے 2026ء توں 2027ء تک ای سی او دی صدارت پاکستان نوں ملن دا ذکر کردیاں ایس سال لئی طے کیتے گئے موضوع ’’مضبوط تے مستحکم ای سی او لئی علاقائی تعاون دی بحالی‘‘ نوں اجاگر کیتا۔

شہباز شریف نے آکھیا کہ ای سی او دے موجودہ معاہدیاں اُتے مؤثر عملدرآمد تے ادارہ جاتی نظام نوں مضبوط بنانا ضروری اے، تاکہ علاقائی معاشی تعاون نوں تیز کیتا جا سکے۔

پاکستان سڑکاں، ریلوے تے نقل و حمل دے مختلف ذرائع اُتے مشتمل راہداریواں دے ذریعے علاقائی رابطیاں نوں ہور مضبوط بناؤن لئی پرعزم اے۔ انہاں راہداریواں وچ کراچی، پورٹ قاسم تے گوادر دیاں بندرگاہاں نال رابطے وی شامل نیں۔

وزیراعظم نے آکھیا کہ علاقائی سلامتی نوں درپیش خطرے نال نمٹن لئی مشترکہ کوششاں ضروری نیں۔

انہاں ای سی او دے رکن ملکاں نوں دعوت دتی کہ اوہ 2027ء لئی لاہور نوں ای سی او دا سیاحتی مرکز قرار دتے جان دی مناسبت نال ہون والیاں تقریبات وچ بھرپور شرکت کرن۔

او آئی سی دے سیکرٹری جنرل اسماعیل ولد الشیخ احمد نال ملاقات دوران وزیراعظم شہباز شریف نے معزز مہمان دا پرتپاک خیرمقدم کیتا۔

دونواں رہنماواں وچ ایس گل اُتے مکمل اتفاق ہویا کہ او آئی سی امت نوں درپیش اہم ترین مسئلیاں تے چیلنجز دے حل لئی مشترکہ کوششاں دی قیادت کرن دا بھرپور تے منفرد مقام رکھدی اے۔

دونواں رہنماواں نے دوٹوک الفاظ وچ فلسطین تے جموں و کشمیر دے مظلوم عوام نال اپنی غیر متزلزل حمایت دا اعادہ کیتا۔

اپنا تبصرہ گھلو