وزیراعظم ولوں چھوٹے تے درمیانے درجے دے کاروباراں لئی ضلعی سطح اُتے سہولت مرکز قائم کرن دی منظوری

برآمد کنندگان دے وفد نال ملاقات، ایس ایم ای سیکٹر تے نویں برآمد کنندگان لئی 300 ارب روپے مختص کیتے نیں: شہباز شریف

اجلاس وچ ایس ایم ای سہولت مراکز دے پائلٹ منصوبے لاہور، پشاور، کراچی تے کوئٹہ وچ قائم کرن دی ہدایت۔

اسلام آباد: وزیراعظم شہباز شریف نال چھوٹے تے درمیانے درجے دے کاروبار (SMEs) نال وابستہ برآمد کنندگان دے وفد نے گزشتہ روز اسلام آباد وچ ملاقات کیتی۔ ایس دوران ایس ایم ایز دے فروغ تے برآمدات وچ آسانی پیدا کرن لئی وزیراعظم نے ضلعی سطح اُتے ایس ایم ای سہولت مراکز قائم کرن دی منظوری دے دتی۔

وزیراعظم نے ایس ایم ای سہولت مراکز دے پائلٹ منصوبے لاہور، پشاور، کراچی تے کوئٹہ وچ قائم کرن دی ہدایت وی کر دتی۔

اجلاس وچ وفاقی وزراء رانا تنویر حسین، جام کمال خان، ڈاکٹر مصدق مسعود ملک، احد خان چیمہ، محمد اورنگزیب، عطا اللہ تارڑ، شزا فاطمہ خواجہ، وزیر مملکت برائے خزانہ بلال اظہر کیانی، معاون خصوصی ہارون اختر، گورنر سٹیٹ بینک، چیئرمین ایس ای سی پی تے متعلقہ اداریاں دے اعلیٰ افسران نے شرکت کیتی۔

وزیراعظم شہباز شریف نال برآمد کنندگان دے وفد دی ملاقات وچ حکومتی اقدامات دی پیش رفت تے اوہناں دے مسئلیاں بارے وی گل بات ہوئی۔

وزیراعظم نے جلد خراب ہون والیاں اشیاء دی برآمد لئی کولڈ سٹوریج دا پائیدار نظام قائم کرن بارے لائحہ عمل جلد از جلد پیش کرن دی ہدایت کیتی۔

شہباز شریف نے آکھیا کہ چھوٹے تے درمیانے درجے دے کاروبار کسے وی ملک دی معیشت دی ریڑھ دی ہڈی دی حیثیت رکھدے نیں۔ برآمدات وچ اضافے لئی سہولتاں مہیا کرنا حکومت دی پہلی ترجیح اے۔

عوام وچ کاروبار شروع کرن بارے آگاہی ودھاؤن لئی سارے ضروری اقدامات کیتے جان۔

ایکسپورٹ فنانس سکیم وچ ایس ایم ای سیکٹر تے نویں برآمد کنندگان لئی 300 ارب روپے مختص کیتے گئے نیں۔ مختص رقم صرف چھوٹے تے درمیانے درجے دے کاروباراں لئی مخصوص ہووے گی۔

پاکستانی برآمدات دے فروغ تے مقامی صنعتاں نوں برآمدی معیار دے مطابق بناؤن لئی ٹریڈ ڈویلپمنٹ اتھارٹی آف پاکستان تے سمیڈا نوں جدید خطوط اُتے استوار کرن دی منظوری دتی گئی اے۔

وفد دے شرکاء نے حکومت دے اقدامات نوں سراہیا تے چھوٹے تے درمیانے درجے دے کاروبار نوں ہور فروغ دین بارے تجاویز پیش کیتیاں۔

وزیراعظم نے وفد دیاں قابلِ عمل تجاویز اُتے غور کرن لئی کمیٹی تشکیل دے دتی۔

اپنا تبصرہ گھلو