سرکاری کڻک دی قیمت 3800 توں ودھا کے 4500 روپے فی من مقرر کرن دا فیصلہ
سرکاری کڻک حاصل کرن والیاں فلور ملز نجی ذخیرے وچوں سرکاری قیمت اُتے آٹے دی فراہمی جاری رکھن گیاں: ذرائع
– اوپن مارکیٹ وچ کڻک دی قیمت 5500 روپے فی من تک پہنچ گئی، سرکاری نرخاں اُتے آٹا فراہم کرنا مشکل اے: فلور ملز مالکان
لاہور (عمران اکبر) پنجاب حکومت نے سرکاری کڻک دی قیمت 3800 روپے توں ودھا کے 4500 روپے فی من مقرر کرن دا فیصلہ کیتا اے۔
ذرائع دے مطابق ڈی جی فوڈ پنجاب تے فلور ملز مالکان وچ سرکاری کڻک تے آٹے دی سپلائی دے معاملات اُتے اتفاق ہو گیا اے۔ سرکاری کڻک حاصل کرن والیاں فعال فلور ملز نجی ذخیرے وچوں سرکاری قیمت اُتے آٹے دی فراہمی جاری رکھن گیاں۔
ڈی جی فوڈ پنجاب سیف انور جپہ تے فلور ملز مالکان وچ اہم ملاقات دوران کڻک تے آٹے دی سپلائی دے معاملات اُتے تفصیلی گل بات ہوئی۔ ڈی جی فوڈ نے واضح کیتا کہ سرکاری کڻک حاصل کرن لئی فلور ملز دے پچھلے 3 مہینیاں توں فعال ہون دی شرط برقرار رہے گی۔ ایس شرط نوں اک مہینہ کرن دی تجویز مسترد کر دتی گئی اے تے موجودہ پالیسی اُتے عملدرآمد جاری رہے گا۔
سیف انور جپہ دا کہنا سی کہ انہاں دا کم پالیسی بنانا نہیں بلکہ حکومت ولوں مقرر کیتی گئی پالیسی اُتے عملدرآمد یقینی بنانا اے، جیہڑا ہر صورت ہووے گا۔ انہاں نوں معلوم اے کہ کیہڑی فلور مل کڻک فروخت کر رہی اے، گھٹ پسائی کر رہی اے یا جعلی ڈیٹا فراہم کر رہی اے۔ قواعد دی خلاف ورزی کرن والیاں ملز نوں اصلاح دا موقع دتا جا رہیا اے، تاہم عوامی مفاد وچ تعاون نہ کرن والیاں دا بلاامتیاز احتساب ہووے گا۔
فلور ملز مالکان دے مطابق اوپن مارکیٹ وچ کڻک دی قیمت 5500 روپے فی من تک پہنچ گئی اے، جس دے باعث نجی ذخیرے وچوں سرکاری نرخاں اُتے آٹا فراہم کرنا مشکل ہو رہیا اے۔ گروپ لیڈر عاصم رضا نے آکھیا کہ ملک وچ کڻک دی کمی موجود اے، حکومت فوری طور اُتے ہور 10 لاکھ ٹن کڻک درآمد کرے۔ انہاں نے 15 کلو نجی آٹے دے تھیلے دی قیمت مقرر کرن دی تجویز نوں وی ناقابلِ عمل قرار دتا۔
فلور ملز مالکان نے موجودہ سپلائی نظام جاری رکھن اُتے اتفاق کیتا اے۔
ذرائع دے مطابق پنجاب وچ سرکاری کڻک جاری کرن دی نئی پالیسی کابینہ نوں بھجوا دتی گئی اے، جس وچ فلور ملز دے 3 مہینیاں توں فعال ہون دی شرط نوں باقاعدہ پالیسی دا حصہ بناؤن دی تجویز وی شامل اے۔





















