پنجاب اسمبلی: پولیس آرڈر تے آرمز ترمیمی بل پیش، کورم پورا نہ ہون اُتے اجلاس ملتوی
پنجاب اسمبلی وچ محکمہ ماہی پروری دی کارکردگی، گنے دی برآمدی قیمت، کڻک دیاں قیمتاں تے سموگ دی روک تھام دے اقدامات اُتے وی بحث
– حکومت ڈگمگا رہی اے، استاد ہون یا کسان، ہر طبقہ ناراض اے: اپوزیشن رکن رانا آفتاب، اج دوبارہ اجلاس ہووے گا۔
لاہور (سیاسی نمائندہ) پنجاب اسمبلی دا اجلاس 2 گھنٹے 13 منٹ دی تاخیر نال پینل آف چیئرپرسن سمیع اللہ خان دی صدارت ہیٹھ شروع ہویا۔ ایوان وچ محکمہ ماہی پروری دی کارکردگی، گنے دی برآمدی قیمت، کڻک دیاں قیمتاں تے سموگ دی روک تھام دے اقدامات اُتے بحث ہوئی، جدوں کہ پولیس آرڈر ترمیمی بل 2026 تے پنجاب آرمز ترمیمی بل 2026 ایوان وچ پیش کر دتے گئے۔ کورم دی نشاندہی دے باعث اجلاس اج منگل دی صبح ساڑھے گیارہ وجے تک ملتوی کر دتا گیا۔
اجلاس دے آغاز اُتے ڈاکٹر فیصل دے سُسر تے رکن اسمبلی صائمہ کنول دے وڈے پرا دے انتقال اُتے فاتحہ خوانی کروائی گئی۔ نو منتخب رکن اسمبلی اسد حنیف نے رکنیت دا حلف چکیا۔
محکمہ آبی زراعت تے ماہی پروری بارے پارلیمانی سیکرٹری میاں عمران جاوید نے سوالاں دے جواب دتے۔ اپوزیشن رکن حسن ملک نے جواباں نوں غیر تسلی بخش قرار دیندے ہوئے آکھیا کہ ضلع خوشاب وچ 1985 توں محکمہ فشریز کول اک ہی پرانی گاڑی موجود اے۔ اپنی سرکاری عمارت نہ ہون دی وجہ توں کروڑاں روپے کرائے دی مد وچ ادا کیتے جا چکے نیں۔ محکمہ ماہی پروری لئی کوئی اقدامات نہیں کیتے جا رہے۔
پارلیمانی سیکرٹری میاں عمران جاوید نے جواب دیندے ہوئے آکھیا کہ وزیراعلیٰ پنجاب صوبے بھر وچ ساریاں نال یکساں سلوک کر رہے نیں۔ پانی دی جانچ دے نتائج درست آون دی صورت وچ خوشاب وچ محکمہ ماہی پروری تے مچھلیاں دی افزائش دے منصوبے شروع کیتے جان گے۔
پارلیمانی سیکرٹری خالد محمود رانجھا نے پولیس آرڈر ترمیمی بل 2026 تے پنجاب آرمز ترمیمی بل 2026 ایوان وچ پیش کیتے۔
اپوزیشن رکن اعجاز شفیع نے پوائنٹ آف آرڈر اُتے گنے دی برآمدی قیمت دا معاملہ چکدے ہوئے آکھیا کہ گنے دی برآمدی قیمت نہیں دسی گئی۔ حکومت آئی ایم ایف دیاں پابندیاں دا جواز پیش کر رہی اے۔ پچھلے سال وی چینی درآمد کیتی گئی سی۔ گزشتہ سال کڻک 2800 روپے فی من خریدی گئی، جدوں کہ ہن ایس دی قیمت 6 ہزار روپے فی من اے۔ ایس ساری صورتحال دا فائدہ مافیا نے چکیا۔
اپوزیشن رکن رانا آفتاب احمد نے آکھیا کہ حکومت ڈگمگا رہی اے، استاد ہون یا کسان، ہر طبقہ حکومت توں ناراض اے۔ ملک نوں بچاؤن دی لوڑ اے۔
ماحولیات بارے پارلیمانی سیکرٹری کنول لیاقت نے آکھیا کہ سموگ دی کوئی اک وجہ نہیں، بلکہ سرحد پار آلودگی، بھٹیاں تے ٹریفک توں نکلن والا دھواں وی ایس وچ اضافے دا سبب اے۔
انہاں دسیا کہ لاہور وچ 13 اینٹی سموگ گنز چھڑکاؤ کر رہیاں نیں، فیصل آباد وچ دو تے گوجرانوالہ وچ اک گن کم کر رہی اے۔ صوبے دیاں 9 ہزار صنعتاں وچ ای سی ایس سسٹم نصب کیتا جا چکیا اے۔ دھواں چھڈن اُتے 249 صنعتاں نوں نوٹس جاری کیتے گئے، جدوں کہ 1479 صنعتاں سیل کیتیاں گئیاں۔ فصلّاں نوں آگ لاؤن والے 222 کساناں خلاف مقدمے درج کیتے گئے تے فضائی آلودگی وچ اضافے دے ذمہ داراں نوں 31 لاکھ روپے جرمانے کیتے گئے۔
اجلاس دوران اپوزیشن رکن علی امتیاز وڑائچ نے کورم دی نشاندہی کر دتی۔ کورم دی نشاندہی اُتے پیپلز پارٹی دے رکن ممتاز چانگ نے سخت ردعمل ظاہر کردیاں آکھیا کہ اوہ 600 کلومیٹر دا سفر کرکے ایوان وچ آئے نیں، پر انہاں نوں اپنے حلقے دے مسائل بیان کرن دا موقع نہیں ملیا۔ ہن انہاں نوں ہور آٹھ دن انتظار کرنا پئے گا۔
کورم پورا نہ ہون اُتے پینل آف چیئرپرسن نے پنجاب اسمبلی دا اجلاس اج منگل دی صبح ساڑھے گیارہ وجے تک ملتوی کر دتا۔





















