مریم دی حکومت بالکل جا رہی اے: لطیف کھوسہ دا دعویٰ
جون دے عدالتی فیصلے اُتے عملدرآمد کرواندیاں عمران نال 4 گھنٹے ملاقات ممکن ہوئی، اخلاقی جرأت اے تے سلمان اکرم سیکرٹری جنرل دے عہدے توں استعفیٰ دے دین: لطیف کھوسہ
اسلام آباد: پی ٹی آئی دے رکن قومی اسمبلی سردار لطیف کھوسہ نے دعویٰ کیتا اے کہ مریم نواز دی حکومت بالکل جا رہی اے۔
اسلام آباد وچ صحافیاں نال گل بات دوران اک صحافی نے انہاں کولوں سوال کیتا کہ جدوں توں عمران خان نال تہاڈی ملاقات ہوئی اے، تسی سیاسی میدان وچ چھکے اُتے چھکا مار رہے او تے بال گراؤنڈ توں باہر سُٹ رہے او۔ چودھری پرویز الٰہی نال ملاقات توں بعد ایہہ خبراں گردش کر رہیاں نیں کہ تسی مریم نواز دی پنجاب حکومت ڈِگاؤن جا رہے او، ایس بارے کھل کے گل کرو؟
ایس اُتے لطیف کھوسہ نے جواب دتا کہ ہاں، مریم نواز دی حکومت بالکل جا رہی اے، تسی فکر ہی نہ کرو۔
ایس توں پہلاں وفاقی آئینی عدالت دے باہر میڈیا نال گل بات کردیاں لطیف کھوسہ نے آکھیا کہ عدالتی فیصلے اُتے عملدرآمد کرواندیاں بانی پی ٹی آئی نال ملاقات ممکن ہوئی۔ جون دے فیصلے اُتے عملدرآمد لئی ملاقات کروائی گئی، ایہہ چار گھنٹے دی ملاقات سی، جیہڑی کوئی چھوٹی ملاقات نہیں سی۔
لطیف کھوسہ دا کہنا سی کہ اج تک سلمان اکرم راجہ گرفتار وی نہیں ہوئے۔ جے اخلاقی جرأت اے تے سلمان اکرم راجہ سیکرٹری جنرل دے عہدے توں استعفیٰ دے دین۔





















