نویں صوبیاں لئی ریفرنڈم دی حمایت کردے آں: عبدالعلیم خان.
ملتان تے بہاولپور سمیت پنجاب وچ نویں صوبے وقت دی اہم لوڑ نیں، نویں صوبیاں دے قیام نال کسے دی بادشاہت متاثر ہون دا خدشہ نہیں: ملتان وچ گفتگو
اسلام آباد: وفاقی وزیر مواصلات عبدالعلیم خان نے آکھیا اے کہ نویں صوبیاں دے قیام لئی ریفرنڈم دی حمایت کردے آں۔ نویں صوبیاں دے قیام بارے ساڈا مؤقف بالکل واضح اے۔ ملتان تے بہاولپور سمیت پنجاب وچ نویں صوبیاں دا قیام وقت دی اہم لوڑ اے۔
اُنہاں آکھیا کہ نویں انتظامی یونٹ بنائے بغیر عام بندے دے مسئلے حل کرنا تے عوام دی مؤثر داد رسی ممکن نہیں۔ جدوں تک نویں صوبے قائم نہیں ہون گے، عام شہریاں نوں مطلوبہ ریلیف فراہم نہیں کیتا جا سکدا۔
عبدالعلیم خان نے آکھیا کہ نویں صوبیاں دے قیام نال کسے نوں اپنی حکمرانی یا بادشاہت متاثر ہون دا خدشہ نہیں ہونا چاہیدا، بادشاہت صرف اللہ تعالیٰ دی اے۔
اُنہاں آکھیا کہ جنوبی پنجاب وچ نیشنل ہائی وے اتھارٹی بھرپور طریقے نال ترقیاتی منصوبیاں اُتے کم کر رہی اے۔ جنوبی پنجاب دے عوام نوں بہتر سفری سہولتاں فراہم کرن لئی مظفرگڑھ، میانوالی روڈ دی تعمیر اُتے وی کم کیتا جا رہیا اے۔
اِنہاں خیالات دا اظہار اُنہاں ملتان دے دورے دوران میڈیا نال گل بات کردیاں کیتا۔ وفاقی وزیر نے لودھراں ایکسپریس وے دا دورہ کیتا تے این 5 اُتے ایس شاہراہ دی بحالی تے تزئین و آرائش دے جاری تعمیراتی کم دا جائزہ لیا۔





















