سالک نے مریم نواز تے عظمیٰ بخاری نوں ہتکِ عزت دے قانونی نوٹس بھیج دتے

غیر مشروط معافی منگی جائے، نہیں تے قانونی کارروائی دا حق رکھدے آں: وفاقی وزیر

جواب دین دی بجائے نوٹس بھیجنا دنیا دا انوکھا تے مزاحیہ معاملہ اے: وزیرِ اطلاعات

لاہور، اسلام آباد: وفاقی وزیر چودھری سالک حسین نے مریم نواز تے عظمیٰ بخاری نوں ہتکِ عزت دے قانونی نوٹس بھیج دتے۔ چودھری سالک حسین ولوں وزیراعلیٰ پنجاب مریم نواز تے وزیرِ اطلاعات پنجاب عظمیٰ بخاری نوں 11 نومبر نوں قانونی نوٹس بھیجے گئے۔

وزیراعلیٰ پنجاب مریم نواز نوں بھیجے گئے نوٹس وچ 3 نومبر نوں اٹک وچ کیتی گئی تقریر دا حوالہ دتا گیا اے، جس وچ وزیراعلیٰ پنجاب نے آکھیا سی کہ گجرات دے اک وزیر، چودھری شجاعت حسین دے پتر سالک حسین نے جھوٹے الزام لائے نیں۔ میں جھوٹے الزام نہیں سنواں گی، ثبوت نیں تے لے آؤ، نہیں تے عدالت وچ گھسیٹاں گی۔

نوٹس وچ سالک حسین نے مؤقف اختیار کیتا کہ غیر مشروط معافی منگی جائے، نہیں تے تسلی بخش جواب نہ دین دی صورت وچ اوہ قانونی کارروائی کرن دا حق رکھدے نیں۔

ایس طرح پنجاب دی وزیرِ اطلاعات عظمیٰ بخاری نوں جاری کیتے گئے نوٹس وچ اوہناں دی 2 نومبر دی ٹویٹ نوں بنیاد بنایا گیا اے۔ عظمیٰ بخاری نوں 7 دناں اندر جواب دین تے غیر مشروط معافی منگن دا مطالبہ کیتا گیا اے۔

سماجی رابطیاں دی ویب سائٹ ایکس اُتے اپنے بیان وچ چودھری سالک حسین نے نوٹس بھیجن دا اعلان کردیاں آکھیا کہ اوہناں نے اپنے قانونی مشیر دے ذریعے ہتکِ عزت دے 2 قانونی نوٹس وی ارسال کیتے نیں، جنہاں وچوں اک وزیراعلیٰ پنجاب مریم نواز شریف تے دوجا عظمیٰ زاہد بخاری نوں بھیجیا گیا اے۔

وفاقی وزیر نے اپنے بیان وچ دوناں قانونی نوٹس بھیجن دی تصدیق کیتی، تاہم اوہناں نے انہاں نوٹسز دے مندرجات، ہرجانے دی رقم یا اپنے الزامات دیاں تفصیلاں بیان نہیں کیتیاں۔

دوجے پاسے وزیرِ اطلاعات و نشریات عظمیٰ بخاری نے آکھیا اے کہ الزام لاؤن والیاں نے جواب دین دی بجائے نوٹس بھیج دتا، ایہہ دنیا دا انوکھا تے مزاحیہ معاملہ اے۔

پروگرام ’’نقطہ نظر‘‘ وچ گل کردیاں عظمیٰ بخاری دا کہنا سی کہ چودھری سالک حسین نے معاملہ شروع کیتا سی، اوہناں نے تے الماریاں کھولنیاں سن، پر الزام لاؤن والیاں نے جواب دین دی بجائے نوٹس بھیج دتا۔

اپنا تبصرہ گھلو