پاکستان وچ کورونا کنٹرول کرن وچ اک سال توں ودھ دا عرصہ لگ سکدا اے

پاکستان وچ کورونا وائرس دے کیساں وچ کمی ضرور آئی اے پر ایہنوں کنٹرول کرن وچ اک سال توں ودھ دا عرصہ لگ سکدا اے۔ ایس گل دا انکشاف پاکستان اسلامک میڈیکل ایسوسی ایشن تے گیلپ پاکستان دے حالیہ سروے وچ 400توں ودھ ڈاکٹراں تے صحت دے شعبے نال جڑے پیشہ ور بندیاں نے کیتا۔ دنیا کورونا وائرس دی وباء نوں کدوں تک قابو وچ کر لوے گی؟ ایس سوال دے جواب وچ 55فیصد ڈاکٹراں نے آکھیا ایہدے وچ اک سال توں ودھ دا عرصہ لگ سکدا اے جد کہ 41فیصد دا خیال سی کہ کجھ مہینے لگ سکدے نیں۔دوجے پاسے 4فیصد ڈاکٹراں دا اندازہ سی کہ کجھ ہفتیاں وچ دنیا کورونا وائرس تے قابو پا لوے گی۔ سروے وچ شامل 66فیصد ڈاکٹراں تے صحت دے شعبے نال جڑے بندیاں نے سرکار نوں حالات وچ بہتری تک لاک ڈاؤن جاری رکھن دا مشورہ وی دتا، پر 4 فیصد دا خیال سی کہ لاک ڈاؤن عید الاضحی تک جاری رہنا چاہیدا اے جد کہ 8فیصد نے لاک ڈاؤن فوراً ختم کرن دا آکھیا۔