صدر تے وزیراعظم دا ساریاں معاملیاں نوں مشاورت نال حل کرن تے اتفاق

آئینی ترامیم مشاورت نال ہوئیاں، اگانہ وی رَل کے حل کڈھاں گے: ایوانِ صدرشہباز شریف مگروں بلاول بھٹو دی وی صدر نال ملاقات، تحمل نال اگے ودھن تے اتفاق، پیپلز پارٹی دا اجلاسملک دیوالیہ ہون دے نیڑے سی، اج زرمبادلہ ذخائر 27 ارب ڈالر نیں: وزیراعظم دا امریکی بزنس کونسل نال خطاب، سیکرٹری جنرل آسیان نال ملاقات

اسلام آباد وزیراعظم شہباز شریف تے صدرِ مملکت آصف علی زرداری دی ملاقات وچ سارے معاملے مشاورت نال حل کرن تے اتفاق ہو گیا اے۔ ایوانِ صدر ولوں جاری بیان موجب ایس ملاقات وچ وفاقی وزیر داخلہ محسن نقوی وی موجود سن۔ ملاقات ویلے مشرقِ وسطیٰ دی صورتحال تے گل بات ہوئی تے ملک دی حالیہ سیاسی صورتحال دا وی تفصیلی جائزہ لیا گیا۔ رہنماواں نے آکھیا کہ پچھلے ویلے وچ آئینی ترامیم ساریاں اتحادی جماعتاں دی باہمی مشاورت نال کیتیاں گئیاں سن، تے آؤن والے ویلے وچ وی سارے معاملیاں تے رَل کے بہواں گے تے گل بات راہیں حل کڈھاں گے۔

صدر تے وزیراعظم دی ملاقات مگروں ایوانِ صدر وچ پیپلز پارٹی دا اک اہم اجلاس ہویا، جیہدے وچ صدر آصف علی زرداری، بلاول بھٹو زرداری، فریال تالپور، وزیراعلیٰ سندھ مراد علی شاہ تے سہیل انور سیال شریک ہوئے۔ ذرائع موجب ایس اجلاس وچ وفاقی وزیر داخلہ محسن نقوی وی شامل سن۔ اجلاس وچ ملک دی مجموعی سیاسی صورتحال، خاص طور تے متنازعہ معاملیاں تے گل بات کیتی گئی۔ ایس توں وکھ حکومت نال پیپلز پارٹی دی قانون سازی دے مختلف معاملیاں تے چل رہی گل بات بارے مشاورت ہوئی، تے نویں صوبے بناؤن بارے چل رہی بحث تے وی وچار کیتا گیا۔ صدرِ مملکت نال چیئرمین پیپلز پارٹی بلاول بھٹو دی ون آن ون ملاقات وی ہوئی۔ ذرائع دا آکھنا اے کہ ملاقات وچ ملک دی موجودہ سیاسی صورتحال تے گل بات ہوئی تے سیاسی معاملیاں نوں تحمل نال حل کرن تے اتفاق کیتا گیا۔ بلاول بھٹو ایس اہم ملاقات مگروں واپس کراچی روانہ ہو گئے۔

اسلام آباد (نامہ نگار، دنیا نیوز) وزیراعظم شہباز شریف نے آکھیا اے کہ پاکستان دی تریخ وچ کدی وی اجیہا موقع نہیں آیا جدوں ملک دی سیاسی تے عسکری قیادت وچکار اینی نتیجہ خیز شراکت داری قائم ہوئی ہووے جِنّی ہُن اے۔ اوہناں آکھیا کہ کاش پہلاں وی انج ہوندا تاں ایہہ ملک بہت پہلاں ترقی کر چکیا ہوندا تے اسیں قومی مفاد لئی باہمی تعاون، ہم آہنگی تے اک دوجے لئی لچک وکھا کے ترقی دی بلندی نوں چھوہ چکے ہوندے۔ امریکن بزنس کونسل پاکستان دی تقریب نال خطاب کردیاں اوہناں آکھیا کہ پاکستان نوں پائیدار معاشی ترقی دے راہ تے ٹورن لئی برآمدات وچ وادھا، نجی شعبے نوں بااختیار بناؤنا تے ڈھانچہ جاتی اصلاحات جاری رکھنیاں پین گیاں۔ اوہناں آکھیا کہ حکومت دا کم کاروبار کرنا نہیں سگوں کاروباری برادری نوں سہولتاں دینا اے تاں جو اوہ سرمایہ کاری، پیداوار تے برآمدات ودھا کے ملکی معیشت دی تبدیلی وچ اپنا حصہ پا سکن۔

وزیراعظم نے آکھیا کہ 2023 وچ پاکستان نوں دیوالیہ (ڈیفالٹ) ہون دا سنگین خطرہ سی، پر اج ملک دے مجموعی زرمبادلہ ذخائر تقریباً 27 ارب ڈالر تیکر اپڑ چکے نیں۔ مہنگائی دی شرح 32 فیصد توں گھٹ کے ساڑھے 11 فیصد جد کہ پالیسی ریٹ ساڑھے 23 فیصد توں گھٹ کے 12 فیصد تے آ گیا اے۔ خلیجی بحران نے دنیا دیاں طاقتور معیشتاں نوں وی متاثر کیتا اے، پر ایس دے باوجود پاکستان استحکام ول ودھ رہیا اے۔ اوہناں آکھیا کہ پاکستان اپنی توانائی دیاں لوڑاں دا 90 فیصد توں ودھ حصہ باہرلے ملکاں توں منگواندا اے جیہدے وچ تیل، گیس، ایل این جی تے پٹرول شامل نیں، ایس دے باوجود ملک وچ پٹرول پمپاں تے ہنگامہ آرائی نہیں ہوئی سگوں حکومت نے معاشرے دے کمزور طبقیاں نوں بچاؤن لئی سبسڈی پروگرام بنایا اے۔ وزیراعظم نے آکھیا کہ ایہہ سارے قدم عام بندے دیاں مشکلاں، محنت تے لگاتار کوششاں نوں سامنے رکھ کے چُکے گئے نیں۔

اوہناں آکھیا کہ پنجاب دے میدانی علاقیاں، سندھ دیاں وادیاں، بلوچستان دے اوکھے پہاڑاں تے خیبر پختونخوا دیاں برف پوش چوٹیاں وچ رہن والے غریب لوکاں لئی اک ویلے دی روٹی، دوائیاں، بالاں دی پڑھائی تے کپڑیاں دا بندوبست کرنا وی اوکھا اے۔ سردیاں وچ اک گرم کمرے دا انتظام کرنا وی اوہناں لئی وڈا مسئلہ ہوندا اے، تے ملک وچ لکھاں بیواواں تے یتیم نیں۔ اجیہے حالات وچ ملک نوں اک اوکھے پر منظم معاشی تبدیلی دے مرحلے وچوں لنگھاؤنا سوکھا نہیں سی۔ اوہناں آکھیا کہ ایہہ کامیابیاں اک ودھیا ٹیم تے سانجھیاں کوششاں توں بنا ممکن نہیں سن، تے پاکستان دی تریخ وچ پہلی واری عسکری تے سیاسی قیادت وچکار اینی مضبوط شراکت داری بنی اے۔ جے ماضی وچ وی قومی مفاد لئی اجیہی ہم آہنگی تے باہمی سمجھ بوجھ وکھائی جاندی تاں پاکستان بہت پہلاں ترقی دیاں منزلاں طے کر چکیا ہوندا۔ ایس توں وکھ وزیراعظم نال ایسوسی ایشن آف ساؤتھ ایسٹ ایشین نیشنز (آسیان) دے سیکرٹری جنرل ڈاکٹر کاؤ کم ہورن نے وزیراعظم ہاؤس وچ ملاقات کیتی۔

وزیراعظم نے آسیان تے جنوب مشرقی ایشیائی خطے نال پاکستان دی پرانی تے ودھدی ہوئی شراکت داری نوں ہور مضبوط کرن دے عزم نوں دہرایا۔ دوہاں دھراں نے تجارت، سرمایہ کاری تے معاشی تعاون نوں ودھاؤن، تے خوراک دے تحفظ، موسمیاتی تبدیلی، انفارمیشن ٹیکنالوجی تے تعلیم دے شعبیاں وچ رَل کے کم کرن دے طریقیاں تے گل بات کیتی۔ وزیراعظم نے ایس گل تے زور دتا کہ موجودہ خیر سگالی نوں ٹھوس معاشی تے ترقیاتی شراکت داری وچ بدلنا چاہیدا اے۔ ایس توں علاوہ پی ایم او ایس (PMOS) ہیٹھ وزارتِ قومی غذائی تحفظ دی کارکردگی بارے جائزہ اجلاس نال خطاب کردیاں وزیراعظم نے آکھیا کہ ملکی معیشت دی مضبوطی تے زرعی شعبے دی پائیدار ترقی وچ جدید تحقیق نوں بنیادی حیثیت حاصل اے۔ اوہناں آکھیا کہ پی ایم او ایس دی شکل وچ وفاقی وزارتاں، ڈویژناں تے اداریاں دی کارکردگی پرکھن دا اک بہت اثر دار نظام بن چکیا اے، تے ایس سسٹم ہیٹھ دتے گئے اہداف تے ٹائم لائنز وچ کسے قسم دی کوئی دیری برداشت نہیں کیتی جاوے گی۔

اپنا تبصرہ گھلو