منی لانڈرنگ کیس: شہباز شریف دی عبوری ضمانت وچ 17اگست تک وادھا

لہور: لہور ہائی کورٹ نے آمدن توں ودھ اثاثے تے منی لانڈرنگ کیس وچ شہباز شریف دی عبوری ضمانت وچ 17اگست تک وادھا کر دتا۔ لہور ہائی کورٹ دے 2رکنی بنچ نے شہباز شریف دی عبوری ضمانت دی عرضی تے سماعت کیتی۔ درخواست گزار نے موقف اپنایا 1972ء وچ بطور تاجر کاروبار دا آغاز کیتا، ایگری کلچر، شوگر تے ٹیکسٹائل انڈسٹری وچ اہم کردار ادا کیتا، 1988وچ سیاست وچ قدم رکھیا، نیب نے بدنیتی دی بنیاد تے آمدن توں ودھ اثاثیاں دا کیس بنایا اے۔ درخواست وچ ہور آکھیا گیا موجودہ حکومت دے سیاسی اثر و رسوخ دی وجہ توں نیب نے انکوائری شروع کیتی اے، انکوائری وچ نیب ولوں لائے گئے الزامات عمومی نوعیت دے نیں، 2018ء وچ ایسے کیس وچ گرفتار کیتا گیا سی، ایس دوران وی نیب دے نال بھرپور تعاون کیتا سی۔