پنجاب: 31پبلشراں دی کتاباں تے پابندی، نجی سکولاں دی کتاباں چیک کرن دا اعلان

پنجاب وچ قومی ہیرواں تے ملکی سالمیت دے خلاف مواد تے مبنی 31پبلشراں دی کتاباں تے پابندی لاگو کر دتی گئی۔ لہور وچ پریس کانفرنس کردیاں منیجنگ ڈائریکٹر پنجاب ٹیکسٹ بورڈ رائے ناصر آکھیا 31پبلشراں دی کتاباں تے پابندی لاگو کر رہے آں، ایہناں کتاباں وچ قومی ہیرواں تے ملکی سالمیت دے خلاف مواد موجود اے۔ اوہناں آکھیا اسلام، ملکی سلامتی، امن عامہ تے اخلاقیات دے خلاف کجھ وی شائع نہیں ہو سکدا ایس لئی قنون دے مطابق ایہ پنج چیزاں غلط ہون تے کتاب تے پابندی ہووے گی۔ رائے ناصر دا کہنا سی پہلاں وی نجی سکولاں وچ پڑھائی جان والی 100کتاباں تے پابندی لا چکے آں جہدے وچ بھارت دے خلاف ساڈا جھگڑا کشمیر دا اے تے کشمیر نوں بھارت دا حصہ وکھایا اے ایتھوں تک کہ غزوہ احد بارے بے شمار ناقابل برداشت گلاں شائع نیں۔ایم ڈی پنجاب ٹیکسٹ بورڈ آکھیا آکسفورڈ دی کئی کتاباں وچ پاکستان نوں خراب ملک دسیا گیا اے تے بھارت نوں ساڈے توں بہت بہتر وکھایا گیا اے جد کہ کیمبرج دی کتاباں وچ بالاں نوں انتہا پسندی دی ترغیب دتی جا رہی اے ایس لئی نجی سکولاں وچ پڑھائی جان والی 10ہزار توں ودھ کتاباں نوں چیک کرن جا رہے آں کیوں جے وڈے سکولاں وچ بالاں دی ایہناں کتاباں دے راہیں تربیت کیتی جا رہی اے۔