کے ۔الیکٹرک دا لائسنس معطل ہونا چاہیدا اے سندھ ہائیکورٹ

کراچی : سندھ ہائیکورٹ نے کے الیکٹرک انتطامیہ تے وکلا اُتے غصہ دا اظہار کر دیاں ہوئیاںبتی چوری تے غیر اعلانیہ لوڈ شیڈ نگ ختم کرن دا حکم دے دتا۔جسٹس خادم حسین ایم شیخ تے جسٹس ارشد حسین خان اُتے مشتمل دو رکنی بینچ دے رو برو شہر وچ بتی چوری تے لوڈ شیڈنگ دے خلاف درخواست دی سماعت ہوئی ۔جسٹس خادم حسین ایم شیخ نے ریمارکس دتے کہ الیکٹرک اُتے ہر کوئی انگلی اٹھا رہیا اے ، ایسی صورت حال وچ تے کے الیکٹرک دا لائسنس معطل ہونا چاہیدا اے ، کراچی دے لوگ کے الیکٹرک دی وجہ نال بوہت وڈی تکلف وچ نیں ، بتی چوری تے غیر اعلانیہ لوڈ شیڈنگ نے شہریاں نوں پریشان کر کے رکھ دتا ہوئیا اے ۔کے الیکٹرک دے وکیل نے موقف دتا کہ شہر دے بوہت علاقیاں وچ کنڈے لا کے بتی چوری کیتی جا ندی اے ۔جسٹس خادم حسین ایم شیخ نے ریمارکس دتے شہروچ ہن کنڈے لگے ہوئے تے لودشیڈ نگ جاری اے ۔کے الیکٹرک دے وکیل نے موقف دتا کہ کئی علاقے ایسے نیں کہ جیتھے ساڈیاں ٹیماں نہیں جا سکدیاں ، بعض علاقیاں وچ کُنڈے ہٹاون توں بعد وی کنڈے دوبارہ لگ جاندے نیں
جسٹس خادم حسین ایم شیخ نے ریمارکس دتے کہ اجے تے تُسی آکھیا کہ کنڈے ہٹا دتے نیں ، ایس دا مطلب اے کہ کے الیکٹرک نے ناکارہ لوگ بھرتی کیتے ہوئے نیں؟جسٹس ارشد حسین خان نے ریمارکس دتے کہ وڈیاں تاراں نوں عام آدمی کُنڈے کسطرح لگا سکدا اے ؟جسٹس خادم حسین ایم شیخ نے ریمارکس دتے کہ اگر کوئی بتی چوری کردا اے تے اوہناں نے خلاف کارروائی کیتی گئی ؟ساڈے ساہمنے گلاں گھٹ بناو، بجلی چوری دے بوہت زیادہ مقدمے بنائے گئے نیں ؟سب پتہ کہ کے کے الیکٹرک والے صرف پیسے بنا رہیے نیں تے ناکارہ ملازمین بھرتی کیتے گئے نیں ۔ اگر کوئی کنڈے دوبارہ بھی لگائے تے ایس دا مطلب اے کہ تہاڈی انتظامیہ ناکارہ اے ۔عدالت نے کے الیکٹرک انتظامیہ تے وکلا اُتے غصے دا اظہار کر دیاں ہوئیاں تاراں توں کنڈے ہٹاون تے غیر اعلانیہ لوڈ شیڈنگ ختم کرن دا حکم دیندیاں ہوئیاں 25اگست نوں کے الیکٹرک انتظامیہ توں رپورٹ طلب کر لئی ۔