وزیراعلیٰ پنجاب عثمان بزدار تے چیئرمین سینیٹ صادق سنجرانی دی ملاقات

اسلام آباد: وزیراعلیٰ پنجاب عثمان بزدار تے چیئرمین سینیٹ دی پنجاب ہاؤس وچ ملاقات ہوئی، صادق سنجرانی نے بلوچستان دی تعمیر و ترقی دے منصوبیاں لئی بھرپور تعاون تے وزیراعلیٰ پنجاب دا شکریہ ادا کیتا۔ وزیراعلیٰ پنجاب نے اپنے حالیہ دورہ بلوچستان بارے چیئرمین سینیٹ صادق سنجرانی نوں آگاہ کیتا۔ عثمان بزدار دا کہنا سی دورہ بلوچستان وچ جہڑی محبت ملی، کدی نہیں بھلا سکاں گا، بلوچستان دے گورنر، وزیراعلیٰ، وزیراں تے عمائدین نال ملاقاتاں انتہائی مفید رہیاں، بلوچستان دی ترقی پاکستان دی ترقی اے، ترقی دے سفر وچ بلوچستان دے نال ہر طرح دا تعاون جاری رکھاں گے۔ عثمان بزدار آکھیا پنجاب حکومت نے تربت وچ ہسپتال تے تفتان وچ کمیونٹی سنٹر دے قیام لئی اک ارب روپے دے فنڈز بلوچستان حکومت نوں دتے نیں، ساڈے سب دے دکھ سکھ سانجھے نیں، بلوچستان وچ رہن والے بھین بھراواں دے مسئلے ساڈے مسئلے نیں۔ چیئرمین سینیٹ صادق سنجرانی دا کہنا سی وزیراعلیٰ عثمان بزدار نے پنجاب تے بلوچستان نوں محبت دی اک ای لڑی وچ پرو دتا اے۔