نیب مجرمان سزا معطل ہون دے بعد عہدے اُتے بحال نہیں ہو سکدے: سپریم کورٹ

اسلام آباد: سپریم کورٹ نے نیب دے سزا یافتہ سرکاری افسر دی نوکری اُتے بحالی دا فیصلہ کالعدم قرار دے دتا۔ ڈپٹی اٹارنی جنرل سہیل محمود آکھیا طاہر عتیق صدیقی ٹیلی فون انڈسٹریز وچ ڈپٹی جنرل منیجر سن، غیر قنونی ٹھیکہ دین دے الزام وچ پنج ورھے قید بامشقت تے 50لکھ جرمانہ ہویا، طاہر عتیق نوں سزا ہون تے محکمے نے برطرف کیتا سی، اسلام آباد ہائی کورٹ نے ملزم طاہر عتیق دی بحالی دا حکم دتا سی جد کہ قنون دے مطابق سزا مکمل ہون دے بعد مجرم دس سال عوامی عہدے لئی نااہل رہندا اے۔ جسٹس اعجاز الاحسن نے ریمارکس دتے سزا معطل ہون نال جرم ختم نہیں ہوندا، اپیل وچ بری ہون تک سرکاری و عوامی عہدے اُتے بحالی نہیں ہو سکدی، نیب مجرمان سزا معطل ہون تے عہدے اُتے بحال نہیں ہو سکدے۔