کراچی وچ صرف نالیاں دی صفائی نال مسئلہ حل نہیں ہووے گا: وزیراعلیٰ سندھ

کراچی: وزیراعلیٰ سندھ مراد علی شاہ آکھیا اے کراچی وچ صرف نالیاں دی صفائی نال نکاسی آب دا مسئلہ حل نہیں ہووے گا۔ مرادعلی شاہ دی زیر صدارت کراچی وچ مون سون دی صورتحال دے حوالے نال اجلاس ہویا جہدے وچ صوبائی وزیراں سعید غنی، ناصر شاہ، کمشنر کراچی، ایم ڈی واٹر بورڈ سنے متعلقہ حکام شریک ہوئے۔ وزیراعلیٰ سندھ مراد علی شاہ آکھیا قدرتی آبی گزرگاہواں تے عمارتاں بن گئیاں نیں، نالیاں دے نال تجاوزارت نیں جہدی وجہ توں بارش دا پانی نہیں نکلدا، صرف نالیاں دی صفائی مسئلے دا حل نہیں۔ لوکل باڈیز دے کول اک باقاعدہ میکنزم ہونا چاہیدا اے، جدوں 30ایم ایم بارش ہووے تے کیہ ایس او پی ہووے گی جے 40ایم ایم بارش ہووے گی تے کیہ ایس او پی ہووے گی۔وزیراعلیٰ سندھ نے ہدایت کیتی شہر وچ جہڑیاں سڑکاں تے نالیاں دے ڈیزائن ٹھیک نہیں ایہناں نوںٹھیک کرن، مینوں ایہناں علاقیاں دا تفصیلی پلان چاہیدا اے جتھے گھراں وچ پانی گیا اے، مینوں شہر دی ساری 28سب ڈویژناں دا پلان دیو، میں ہر سب ڈویژن تے وزیر یا مشیر دی ڈیوٹی لاواں گا۔