فضل الرحمان اقتدار نشہ اترن مگروں مارے مارے پھر رہے نیں: فیاض الحسن

لہور: فیاض الحسن چوہان آکھیا اے مولانا فضل الرحمان پورے دیس وچ مارے مارے پھر رہے نیں۔ سیاسی رابطیاں، لانگ مارچ تے عدم اعتماد دی تحریکاں نال جگ ہنسائی ہوئی، غیر متحدہ اپوزیشن جان چکی اے موجودہ حکومت آئینی مدت پوری کرے گی۔ وزیر اطلاعات پنجاب فیاض الحسن چوہان دا کہنا سی شہباز شریف تے مولانا فضل الرحمان دی ملاقات دراصل سیاسی یتیماں دی ملاقات سی، سندھ وچ مولانا دی آصف تے بلاول نال ملاقات دا چن ضیاء الرحمان دی صورت وچ چڑھیا سی، ہن ویکھو مولانا دی شہباز شریف نال ملاقات کیہ گل کھلاندی اے۔ اپوزیشن اے پی سی تے سیاسی گٹھ جوڑ دا لالی پاپ صرف اپنے ووٹراں نوں بے وقوف بنان لئی استعمال کر رہی اے۔ فیاض الحسن نے ہور آکھیا وزیراعظم عمران خان تے پی ٹی آئی دے خلاف کینہ، بغض تے عناد مولانا نوں سکون دی نیندر نہیں سون دیندا۔دو سال پہلاں میں مولانا نوں اپنے سیاسی و معاشی صغیرہ تے کبیرہ گناہواں تے معافی منگن دا مشورہ دتا سی، اجے وی مولانا دے کول مصلے وچھا کے توبہ و استغفار کرن دا ویلا اے۔