شریف خاندان دی شوگر ملز توں کساناں نوں اک ارب36کروڑ توں ودھ رقم واجب الادا

شوگر ملز ولوں کساناں نوں رقم ادا نہ کرن دے حوالے نال شوگر کمیشن دی رپورٹ منظرعام تے آ گئی۔ شوگر کمیشن دی رپورٹ دے مطابق شریف خاندان دی دو شوگر ملز نے ایس ورھے خریدے گئے گنے دے کروڑاں روپے ادا نہیں کیتے۔ رمضان شوگر ملز دے ذمہ کساناں دے 46کروڑ 34لکھ روپے واجب الادا نیں جد کہ ہارون اختر خان دی ملکیتی دو شوگر ملز تاندلیانوالہ ون تے ٹو دے ذمہ 26کروڑ روپے واجب الادا نیں۔ العربیہ شوگر ملز نے 9کروڑ83لکھ روپے، چنار شوگر ملز 8کروڑ 74لکھ روپے تے حسین شوگر ملز نے کساناں نوں 6کروڑ 60لکھ روپے ادا نہیں کیتے۔ حق باہو شوگر ملز دے ذمہ چار کروڑ 90لکھ ، شکر گنج ون تے ٹو دے ذمہ کساناں دے 19کروڑ روپے واجب الادا نیں۔ رپورٹ دے مطابق ایس ورھے پنجاب دی 41شوگر ملز نے اک کھرب 75ارب 44کروڑ روپے دا گنا خریدیا۔ شوگر ملز ولوں کسانوں نوں اک کھرب 74ارب 8کروڑ روپے دی ادائیگیاں کیتی گئیاں نیں۔ دوجے پاسے شوگر ملز ایسوسی ایشن دا کہنا اے ادائیگیاں مرحلہ وار کیتی جاندیاں نیں، واجب الادا رقم چھیتی ادا کر دتی جائے گی۔