مودی سرکار نے مقبوضہ کشمیر نوں جیل وچ بدل دتا : شبلی فراز

اسلام آباد( بھلیکھا ٹی وی ) شبلی فراز نے آکھیا کہ بھارت دے غیر قانونی اقدام نوں اک سال ہو گیا ، مودی سرکار نے مقبوضہ کشمیر نوںجیل وچ بدل دتا ، پوری قوم کشمیریاں نال شانہ بشانہ کھڑی اے ، کشمیریاں نوں بھارتی تسلط توں آزادی ضرور ملے گی ۔اسلام آباد وچ وفاقی وزیر اطلاعات شبلی فراز دی قیادت وچ ریلی کڈی گئی ، جس اندر مختلف مکتب فکر دے بندیاں نے بوہت وڈی تعداد وچ رلت کیتی ، ریلی نال خطاب کردیاں ہوئیاں شبلی فراز نے آکھیا کہ یوم استحصال مناون دا مقصد عالمی برادری دی توجہ مقبوضہ کشمیر دی طرف دلانا اے ، عالمی برادری نوں کشمیریاں اُتے جاری ظلم دے خلاف آواز بلند کرنی پئے گی ، عالمی برادری کشمیری عوام اُتے ہوون والے ظلم اُتے خموش اے ، منافقانہ رویے توں عالمی امن نوںنقصان پہنچ سکدا اے ، بھارت نوں مقبوضہ کشمیر اُتے ظلم دا حساب دینا پئے گا ۔