اداریاں وچکار تصادم نال عدم استحکام لیان والے ہار گئے: وزیراعظم
اسلام آباد: وزیراعظم عمران خان نے سپریم کورٹ دے فیصلے مگروں اپنے بیان وچ آکھیا اے اداریاں وچکار تصادم نال عدم استحکام لیان والے ہار گئے نیں۔
سماجی رابطیاں دی ویب سائٹ ٹویٹر تے جاری اپنے بیان وچ وزیراعظم عمران خان نے لکھیا کہ مافیا نے دیس توں لٹی ہوئی رقم واپس بھجوائی۔
مافیا لٹی دولت بچان لئی عدم استحکام لیانا چاہندا اے پر بیرونی دشمناں تے اندرونی مافیا لئی اج مایوس دا دیہاڑ اے۔ ایس توں پہلاں وزیراعظم عمران خان نال قنونی ٹیم نے ملاقات کیتی تے عدالتی کاروائی بارے بریفنگ دتی۔ وزیراعظم نال ملاقات کرن والیاں وچ اٹارنی جنرل انور منصور وی شامل سن۔
وزیراعظم عمران خان نوں عدالتی کاروائی بارے بریفنگ دتی گئی تے عدالتی احکامات دی روشنی وچ مسودے دا جائزہ وی لیا گیا۔
خیال رہوے سپریم کورٹ نے آرمی چیف دی مدت ملازمت وچ 6مہینے دی توسیع کردیاں حکومت نوں چھ مہینے وچ قنون سازی دا حکم دتا اے۔
عدالت عالیہ نے اپنے فیصلے وچ آکھیا ایہ معاملہ پارلیمنٹ تے حکومت تے چھڈنے آن، آرمی چیف نوں 28نومبر توں توسیع دے رہے آں۔ تقرری 6مہینے لئی ہووے گی، قوانین بنن دے بعد ہور ویکھیا جاوے گا۔وزیراعظم نے اپنی ٹویٹ وچ لکھیا کہ 23ورھیاں پہلے آزاد عدلیہ تے قنون دی حکمرانی لئی تحریک انصاف نے آواز چُکی۔
ججز بحالی تحریک وچ پی ٹی آئی صف اول تے کھڑی سی۔
عدلیہ دی آزادی لئی میں جیل کٹی۔ اوہناں نے لکھیا میرے دل وچ چیف جسٹس کھوسہ لئی بے حد احترام اے، اوہ ملک دے عظیم ججاں وچوں اک نیں۔
