سرکار نے بجلی دی فی یونٹ قیمت وچ 11پیسے وادھے دی منظوری دے دتی
اسلام آباد: سرکار نے یکم دسمبر 2019توں اگلے اک ورھے لئی بجلی دی فی یونٹ تے 11پیسے وصولی دے نوٹیفکیشن دی منظوری دے دتی۔
مشیر خزانہ حفیظ شیخ دی زیر صدارت کابینہ دی اقتصادی رابطہ کمیٹی دا اجلاس ہویا، اجلاس وچ ای سی سی نے ایس مالی ورھے 2019-20دی پہلی سہ ماہی لئی نیپرا دی منظور شدہ 15پیسے فی یونٹ سہ ماہی وادھے وچوں 11پیسے فی یونٹ اضافی وصولی دے نوٹیفکیشن دی منظوری دے دتی، نوٹیفکیشن دا اطلاع یکم دسمبر 2019توں اگلے اک ورھے لئی ہووے گا۔
ملک وچ بجلی دے کل تن کروڑ صارفین وچوں 300یونٹس ماہانہ استعمال کرن والے دو کروڑ گھریلو صارفین تے ایس نوٹیفکیشن دا اطلاق نہیں ہووے گا جد کہ باقی اک کروڑ صارفین وچ 60لکھ صارفین لئی 7پیسے فی یونٹ دا وادھا ہووے گا۔
اقتصادی رابطہ کمیٹی نے مستقبل وچ بجلی دیاں قیمتاں دے تعین دے طریقہ کار نوں ہور جامع تے سہل بنان لئی مشیر خزانہ و محصولات حفیظ شیخ دی سربراہی وچ اک کمیٹی قائم کر دتی، جہدے وچ وزیر قومی غذائی تحفظ و تحقیق مخدوم خسرو بختیار، وزیر توانائی عمر ایوب خان، مشیر صنعت وپیداوار عبدالرزاق داؤد تے وزیراعظم دے معاون خصوصی برائے پٹرولیم ندیم بابر شامل ہون گے۔
