سرکار نے تیاری کیتی ہوندی تے آرمی چیف دے معاملے تے سبکی نہ ہوندی: حمزہ شہباز

لہور: پنجاب اسمبلی وچ قائد حزب اختلاف حمزہ شہباز دا کہنا اے سرکار نے تیاری کیتی ہوندی تے آرمی چیف دے معاملے تے سبکی نہ ہوندی۔

پنجاب اسمبلی وچ صحافیاں نال غیر رسمی گل بات دے دوران حمزہ شہباز نے آکھیا جے حکومت نے ہوم ورک کیتا ہوندا تے آرمی چیف دے معاملے تے ایہنوں عدالت وچ سبکی نہ ہوندی، آرمی چیف دی توسیع تے تفصیلی فیصلہ آوے گا تے ایہدے تے لائحہ عمل دتا جاوے گا۔

رہنما (ن) لیگ دا کہنا سی پچھلے 13توں 14مہینے وچ ماحول بہت تلخ ہو گیا اے، سیاست وچ تلخی ایس حد تک ودھا دتی گئی اے کہ بیماری ثابت کرن لئی مرنا پیندا اے، نوازشریف نے عمران خان دی تیمارداری کیتی تے 2دن لئی انتخابی مہم تک معطل کیتی، وڈا ظرف کسے کسے نوں ای ملدا اے، نوازشریف دے گردے ، دل تے دوجے مسئلیاں نیں، دوران قید اوہناں دی بیوی فوت ہو گئی، مریم نواز نے جیل وچ اپنی ماں نوں کھویا، پیو دی تیمارداری لئی نواز شریف کول جانا چاہیدا اے۔