ہوٹل، پارکس، سیاحتی مقامات کھولن دا اعلان، مارکیٹاں دے پرانے اوقات کار بحال

اسلام آباد: وفاقی حکومت نے لاک ڈاؤن وچ ہور نرمی کردیاں ریسٹورنٹس، تفریحی مقامات تے شادی ہالز سنے دوجے شعبہ جات تے کاروبار بتدریج کھولن دا اعلان کر دتا۔ وفاقی وزیر برائے ترقی و منصوبہ بندی اسد عمر دی زیر صدارت اسلام آباد وچ نیشنل کمانڈ اینڈ آپریشن سنٹر (این سی او سی) دا اجلاس ہویا جہدے وچ دیس وچ کورونا وباء دی صورتحال تے غور کیتا گیا۔ بعدوں اسد عمر نے میڈیا بریفنگ دیندیاں آکھیا دیس وچ کورونا وباء وچ کمی ہو گئی تے صورتحال کافی بہتر ہو گئی اے، این سی او سی دے اجلاس وچ تعلیمی اداریاں نوں 15ستمبر نوں کھولن دا فیصلہ برقرار رکھیا گیا، ایہدے نال نال سرکار نے لاک ڈاؤن وچ ہور نرمی کردیاں ہور شعبہ جات کھولن دا فیسلہ کیتا اے۔ اسد عمر نے دسیا 8اگست (ہفتہ) نوں سیاحتی مقامات تے اوتھوں دے ہوٹلز جد کہ 10اگست پیر توں دیس بھر وچ پبلک پارکس، تفریحی مقامات، ایکسپو ہالز، بیوٹی پارلرز، مزارات، مذہبی مقامات، سینما، تھیٹرز، جم، کلب، ہوٹل، کیفے تے ریسٹورنٹس کھول دتے جان گے جتھے اندر تے باہر بیٹھ کے کھانا کھان (ڈائن ان) دی اجازت ہووے گی۔اسد عمر نے ہور آکھیا روڈ ٹرانسپورٹ، ریلوے، ایئر لائن نوں وی معمول دے مطابق بحال کیتا جا رہیا اے، ایہناں تے ساری قدغناں تے بندشاں ختم کیتی جا رہیاں نیں پر میٹرو سروسز تے بساں وچ کھڑے ہو کے سفر دی اجازت نہیں ہووے گی جد کہ موٹرسائیکل دی ڈبل سواری دی اجازت وی دین دا فیصلہ کیتا گیا اے۔ وفاقی وزیر نے آکھیا بازاراں دے اوقات کار وی معمول دے مطابق بحال کیتے جا رہے نین تے ساری مارکیٹاں پرانے نظام دے مطابق کھولن دی اجازت دتی جا رہی اے، ایہناں لئی ویلے دی پابندی تے ہفتہ تے اتوار دی چھٹی ختم کیتی جا رہی اے۔ اسد عمر دا کہنا سی 15ستمبر توں شادی ہالز کھولے جا سکدے نیں تے ہوٹلز وچ وی شادی دی تقریبات ہو سکدیاں نیں، 14اگست دے حوالے نال وی گائیڈ لائنز جاری کراں گے تے محرم الحرام لئی وی علماء نال رل کے ایس او پیز بنائی گئیاں نیں۔