دنیا نوں کورونا نال نبڑن لئی پاکستان توں سکھن دی لوڑ اے: صدر جنرل اسمبلی
اسلام آباد: اقوام متحدہ دی جنرل اسمبلی دے صدر وولکن بوزکر آکھیا اے دنیا نوں کورونا نال نبڑن لئی پاکستان دی کوششاں توں سکھن دی لوڑ اے۔ اقوام متحدہ جنرل اسمبلی دے صدر وولکن بوزکر دے نال پریس کانفرنس دے دوران شاہ محمود قریشی آکھیا وولکن بوزکر نال ملاقات خوشگوار رہی اے۔ ایس موقع تے اسیں اوہناں نوں کورونا نال نبڑن لئی اقدامات، افغانستان وچ قیام امن لئی پاکستان دے کردار تے مقبوضہ کشمیر وچ انسانی حقوق دی خلاف ورزیاں بارے آگاہ کیتا۔ وولکن بوزکر آکھیا پاکستان آ کے خوشی محسوس ہوئی، پاکستان نے بہترین انداز نال میزبانی کیتی، پاکستان اقوام متحدہ جنرل اسمبلی دا اہم رکن ملک اے، خطے وچ قیام امن لئی پاکستان کردار قابل تعریف اے، اوہناں دی وزیر خارجہ شاہ محمود قریشی نال اہم امور تے گل ہوئی۔ ایہدے علاوہ وزیراعظم عمران خان نال وی ملاقات ہوئی، وزیراعظم عمران خان نے مقبوضہ کشمیر بارے صورتحال توں آگاہ کیتا۔ ملاقات وچ وزیراعظم عمران خان دے خیالات توں متاثر ہویا۔ وولکن بوزکر آکھیا کورونا وائرس نال نبڑنا دنیا بھر دے ملکاں لئی چیلنج اے، پاکستان ایس عالمی وباء توں بہترین انداز نال نبڑیا، دنیا نوں کورونا نال نبڑن لئی پاکستان دی کوششاں توں سکھن دی لوڑ اے۔
