کراچی نوں بنان والا کوئی نہیں، لوک آندے نیں تے جیب بھر کے چلے جاندے نیں: چیف جسٹس
کراچی: چیف جسٹس پاکستان دا کہنا اے کراچی نوں بنان والا کوئی نہیں، لوک آندے نیں تے جیب بھر کے چلے جاندے نیں۔ سپریم کورٹ کراچی رجسٹری وچ بل بورڈ ڈگن بارے ازخود نوٹس دی سماعت کردیاں چیف جسٹس گلزار احمد نے شدید برہمی دا اظہار کردیاں آکھیا کراچی نوں بنان والا ہن تک کوئی نہیں آیا، لگدا اے سرکار تے میئر دی شہریاں نال دشمنی اے، ہر بندہ آپ مارشل لاء بنیا بیٹھا اے، سندھ سرکار دی رٹ کتھے اے، کوئی ہے جہڑا ایس شہر نوں صاف کرے۔ چیف جسٹس نے ریمارکس دتے ایتھے سرکار ناں دی کوئی چیز نہیں اے، جے کسے دے کول پیسے نیں تے اوہ سب کر لیندا اے، سندھ وچ قنون ناں دی کوئی چیز نہیں، ٹُٹی سڑکاں، کچرے تے ایس تعفن دا ذمہ دار کون اے، بچے گٹر دے پانی وچ روز ڈوب رہے نیں، وزراء وڈی وڈی گڈیاں وچ گھمدے نیں، کراچی نوں ہر کوئی تباہ کر رہیا اے، کراچی توں ہر کوئی اپنے حصے دی بالٹی بھر کے چلا جاندا اے، مافیا حکومتاں نوں پال رہی اے، حکومتاں ایس مافیا دا کیہ وگاڑن گیاں۔ جسٹس گلزار احمد نے ریمارکس دتے چھوٹے چھوٹے مکان سن، اُچی عمارتاں بنا دتیاں گئیاں، کیہنے اجازت دتی ایہ عمارتاں بنان دی۔
