پارک لین ریفرنس، آصف زرداری تے دوجے ملزمان تے فرد جرم لاگو

اسلام آباد: احتساب عدالت نے پارک لین ریفرنس وچ سابق صدر آصف زرداری تے ویڈیو لنک دے راہیں فرد جرم لاگو کر دتی۔ اسلام آباد دی احتساب عدالت دے جج اعظم خان نے پارک لین ریفرنس تے سماعت کیتی، آصف زرداری ویڈیو لنک دے راہیں بلاول ہاؤس کراچی توں عدالت وچ پیش ہوئے۔ دوران سماعت آصف زرداری آکھیا اوہناں دے وکیل سپریم کورٹ وچ نیں اوہناں دی غیر موجودگی وچ فرد جرم لاگو نہیں کیتی جا سکدی جہدے تے فاضل جج اعظم خان نے ریمارکس دتے فرد جرم تہاڈے تے لاگو کیتی جائے گی۔ جے تہاڈے وکیل نہیں آندے تے اسیں اوہناں دی غیر حاضری لاواں گے۔ عدالت آصف زرداری، انور مجید، شیر علی، فاروق عبداللہ، سلیم فیصل تے محمد حنیف تے وی فرد جرم لاگو کر دتی۔ آصف زرداری تے انور مجید سنے سارے ملزمان نے صحت جرم توں انکار کر دتا۔ عدالت ولوں آصف زرداری تے لاگو فرد جرم وچ آکھیا گیا اے اوہناں نے بطور صدر مملکت متعلقہ حکام تے اثر انداز ہو کے قرض دی رقوم فرنٹ کمپنیاں نوں جاری کروائیاں، اوہناں نے بدنیتی نال اپنی فرنٹ کمپنی پارتھینون نوں ڈیڑھ ارب روپے دا قرضہ دوایا۔ اوہ پارک لین کمپنی دے ڈائریکٹر سن تے جعلسازی دا منصوبہ بنایا، اوہناں نے فراڈ نال حاصل ہون والی رقم اپنے ذاتی مقاصد لئی استعمال کیتی، ایہ رقم جعلی بینک اکاؤنٹس وچ گھلی گئی۔