سپریم کورٹ نے کراچی توں سارے بل بورڈز فوری ہٹان دا حکم دے دتا

کراچی: چیف جسٹس پاکستان جسٹس گلزار احمد نے شہر توں سارے بل بورڈز فوری ہٹان دا حکم دیندیاں ریمارکس دتے سندھ وچ قنون ناں دی کوئی چیز نہیں۔ سپریم کورٹ کراچی رجسٹری وچ چیف جسٹس جسٹس گلزار احمد دی سربراہی وچ 3رکنی بنچ نے غیر قنونی بل بورڈز بارے کیس تے سماعت کیتی، کمشنر کراچی تے میئر وسیم اختر عدالت وچ پیش ہوئے۔ جسٹس گلزار احمد نے اداریاں دی ناقص کارکردگی تے شدید اظہار برہمی دا اظہار کیتا۔ دوران سماعت اوہناں نے ریمارکس دتے تسیں لوکاں نے شہر دا حلیہ وگاڑ دتا اے، سب توں ودھ بل بورڈز رہائشی عمارتاں تے لگے نیں۔ شارع فیصل تے عمارتاں ویکھو اشتہار ای اشتہار لگے نیں، اوتھے لوک کیویں جیندے ہون گے، سرکار دا کم اے کہ بلڈنگ پلان تے عمل کرائے پر ایتھے سرکار ناں دی کوئی چیز نہیں اے، جے کسے دے کول پیسے نیں تے اوہ سب کر لیندا اے۔جسٹس گلزار احمد نے ریمارکس دتے کراچی وچ بجلی دا بحران وی بدترین ہو گیا اے، سب اک دوجے نوں مارن تے تلے نیں، روز 8دس لوک مر رہے نیں تے نیپرا کجھ نہیں کر رہی اے۔