بھارت وچ گستاخانہ فیس بک پوسٹ تے ہنگامے ، پلس دی فائرنگ نال 3بندے جاں بحق
بنگلور( بھلیکھا ٹی وی )بھارت وچ کانگریس رہنما دے رشتہ دار دی گستاخانہ فیس بک پوسٹ دے خلاف احتجاجی مظاہریاں تے پلس دی فائرنگ نال 3بندے جاں بحق تے کئی زخمی ہو گئے۔ عالمی خبر رساں ادارے دے مطابق بنگلور وچ کانگریس دے مقامی رہنما دے اک رشتہ دار نوین نے فیس بک تے نبی اکرمۖ بارے توہین آمیز پوسٹ کیتی جہدے تے مسلماناں وچ غم و غصے دی لہر دوڑ گئی۔ شہریاں نے کانگریس دے ایم ایل اے دے گھر تے شدید شدید احتجاج کیتا تے پوسٹ کرن والے بندے دی گرفتاری دا مطالبہ کیتا۔پلس ولوں حساس معاملے تے جانبداری دا مظاہرہ کرن تے علاقہ مکین مشتعل ہو گئے تے شہریاں نے تھانے دا گھیراؤ کر لیا۔ پلس نے لوکاں نوں منتشر کرن لئی لاٹھی چارج کیتا تے براہ راست گولیاں چلائیاں جہدے نتیجے وچ 3بندے جاں بحق تے کئی زخمی ہو گئے۔پلس نے مظاہرین دے خلاف کریک ڈاؤن آپریشن کیتا تے 100توں ودھ مظاہرین نوں حراست وچ لے لیا۔ بعدوں پلس نے فیس بک تے متنازعہ تے اشتعال انگیز پوسٹ کرن والے بندے دی گرفتاری دا وی دعویٰ کیتا اے۔دوجے پاسے کانگریس دے ایم ایل او نے ویڈیو پیغام وچ ذمہ دار نوں قنون دے کٹہرے وچ لیان دا وعدہ کردیاں پرامن رہن دی اپیل کیتی۔ کرناٹک دے امیر شریعت مولانا صغیر احمد نے وی شہریاں نوں قنون ہتھ وچ نہ لین دی ہدایت کردیاں آکھیا ذمہ دار نوں سخت توں سخت سزا دتی جائے گی۔
