سپریم کورٹ نے وزیراعظم دے اختیار نوں تسلیم کیتا: ترجمان وزیراعظم

اسلام آباد: ترجمان وزیراعظم ندیم افضل چن دا کہنا اے سپریم کورٹ نے وزیراعظم دے اختیار نوں تسلیم کیتا۔

آرمی چیف جنرل قمر جاوید باجوہ بارے عدالتی فیصلے تے وزیراعظم دے ترجمان ندیم افضل چن نے آکھیا پارلیمنٹ سپریم اے قنون سازی ای اصل ذمہ داری اے، منفی پروپیگنڈا کرکے غیر یقینی صورتحال پیدا کرن دی کوشش کیتی گئی، دوران کیس جنرل باجوہ دی ذات تے وی کوئی سوال نہیں کیتا، صورتحال دے نتیجے وچ سیاسی استحکام پیدا ہووے گا۔

ترجمان وزیراعظم ندیم افضل چن دی میڈیا دے کردار دی تعریف کردیاں آکھیا عدالتی فیصلے بارے میڈیا نے ذمہ داری دا مظاہرہ کیتا، چار دن تک میڈیا تے اپوزیشن جماعتاں نے بصیرت نال کم لیا، ملکی جمہوریت تے آزادی اظہار لئی ایہ کردار اہم اے، کجھ لوک چپ رہ کے وی اشارتاً بہت گلاں کردے سن۔

ندیم افضل نے آکھیا ملکی تریخ وچ عدلیہ، پارلیمنٹ ایگزیکٹو تے فوج لئی چنگا دن اے، اداریاں دے آئینی حقوق نوں تسلیم کیتا گیا اے، سپریم کورٹ نے وزیراعظم دے فیصلے تے مہر ثبت کیتی اے تے سپریم کورٹ نے وزیراعظم دے اختیار نوں تسلیم کیتا جد کہ اپوزیشن وزیراعظم دے فیصلے دے نال کھڑی اے۔