کاروبار، روزگار ختم کرکے معاشی بہتری دا کہن والیاں نوں شرم آنی چاہیدی اے: مریم اورنگزیب

اسلام آباد: مریم اورنگزیب آکھیا اے قومی ترقی 5.8توں 0.4فیصد تے لیا کے کہندے نیں معیشت درست، کاروبار، روزگار ختم کرکے معاشی بہتری دا کہن والیاں نوں شرم آنی چاہیدی اے۔

ترجمان مسلم لیگ (ن) مریم اورنگزیب نے وزیراعظم دے بیان تے ردعمل دیندیاں آکھیا کرنٹ اکاؤنٹ خسارے دا کریڈٹ لین والیاں نوں علم نہیں قومی ترقی دا جنازہ کڈھ دتا اے، کرنٹ کاؤنٹ خسارے وچ کمی دا مطلب اے بیرونی سرمایہ کاری، پلانٹس تے خام مال آنا بند ہو گیا، ملکی ترقی منجمد کرکے اج کریڈٹ لیا جا رہیا اے۔ کرنٹ اکاؤنٹ خسارہ گھٹ ہو گیا۔

مریم اورنگزیب دا کہنا سی وزیراعظم اک سالہ بدترین کارکردگی دا اپنے دوجے سال دی نااہلی نال موازنہ کرکے خوش ہو رہے نیں، موازنہ ای کرنا اے تے 2018دا 2019تے 2020نال کرو تاں جے تہانوں سچائی نظر آئے، روپے دی قدر وچ 45فیصد کمی کرکے کہندے نیں کہ معیشت درست سمت جا رہی اے، دو سال وچ 13ہزار ارب دا قرض لیا، اک نویں اِٹ نہیں لائی گئی۔

اپنا تبصرہ گھلو